కాంగ్రెస్ పార్టీ నేత రాహుల్ గాంధీ (Rahul) ఇవాళ ఢిల్లీలో ఓ ప్రత్యేక ప్రెస్ మీట్ నిర్వహించనున్నారు. ఇందిరా భవన్ ఆడిటోరియంలో ఉదయం 10 గంటలకు జరగబోయే ఈ సమావేశంపై ఇప్పటికే రాజకీయ వర్గాల్లో ఆసక్తి పెరిగింది. పార్టీ వర్గాలు ఆయన ప్రసంగం ఏ అంశాలపై ఉంటుందనే విషయాన్ని స్పష్టంగా వెల్లడించకపోవడంతో ఊహాగానాలు మరింత వేగం పుంజుకున్నాయి. ముఖ్యంగా రాబోయే ఎన్నికల దృష్ట్యా ఈ ప్రెస్ మీట్ కీలకమని భావిస్తున్నారు.
రాహుల్ గాంధీ ప్రెస్ మీట్లో కొత్తగా రెండు రాష్ట్రాల రెండు అసెంబ్లీ నియోజకవర్గాలు, అలాగే ఓ హై ప్రొఫైల్ లోక్సభ నియోజకవర్గంపై ఓటు చోరీ ఆరోపణలు బయటపెట్టబోతున్నారనే ప్రచారం రాజకీయ వర్గాల్లో బలంగా వినిపిస్తోంది. ఈ ఆరోపణలతో పాలకపక్షం ఇబ్బందులు ఎదుర్కొనే అవకాశం ఉందని విశ్లేషకులు చెబుతున్నారు. ఇటీవలే పలు రాష్ట్రాల్లో ఓటర్ల జాబితాలపై అనుమానాలు, అక్రమాలు బయటపడటంతో, రాహుల్ గాంధీ ప్రస్తావించే అంశాలు మరింత ప్రాధాన్యత సంతరించుకోనున్నాయి.
కాంగ్రెస్ ఇప్పటికే ప్రజాస్వామ్యాన్ని కాపాడాలన్న నినాదంతో ప్రచారం సాగిస్తోంది. ఈ నేపథ్యంలో రాహుల్ గాంధీ ప్రెస్ మీట్ పార్టీ వ్యూహంలో భాగమని చెప్పవచ్చు. ఆయన ప్రసంగం ద్వారా కేవలం ఓటు చోరీ ఆరోపణలకే కాకుండా, కేంద్ర ప్రభుత్వాన్ని లక్ష్యంగా చేసుకుని పలు విమర్శలు వచ్చే అవకాశం ఉందని కాంగ్రెస్ వర్గాలు చెబుతున్నాయి. ఈ ప్రెస్ మీట్ తర్వాత రాజకీయ వాతావరణం మరింత వేడెక్కనుందని, ఇతర పార్టీలు కూడా దీనిపై స్పందించవచ్చని అంచనా వేయబడుతోంది.
