ప్రధానమంత్రి నరేంద్ర మోదీ గురువారం ఢిల్లీలో ఆంధ్రప్రదేశ్, తెలంగాణ మరియు అండమాన్ నికోబార్ దీవులకు చెందిన సుమారు 15 మంది బీజేపీ ఎంపీలతో అల్పాహార విందు సమావేశాన్ని నిర్వహించారు. సుమారు అరగంట పాటు జరిగిన ఈ భేటీలో, తెలుగు రాష్ట్రాల్లో పార్టీ భవిష్యత్తు వ్యూహాలు, ప్రస్తుత రాజకీయ పరిస్థితులు, ప్రభుత్వాల పనితీరుపై ప్రధాని చర్చించారు. ఆంధ్రప్రదేశ్లో ముఖ్యమంత్రి చంద్రబాబు నాయుడుతో కలిసి టీడీపీ-బీజేపీ-జనసేన కూటమి ముందుకు సాగడాన్ని మోదీ మంచి పరిణామంగా ప్రశంసించారు. ఏపీకి పెట్టుబడులు భారీగా వస్తున్నాయని, ఇది రాష్ట్ర అభివృద్ధికి చాలా మంచి అవకాశమని పేర్కొన్నారు. ముఖ్యమంత్రి చంద్రబాబు నాయుడు నేతృత్వంలోని రాష్ట్ర పరిపాలనపై ప్రజల నుంచి మంచి ఫీడ్బ్యాక్ వస్తోందని, ఇది కూటమికి, బీజేపీకి కూడా ప్రయోజనకరమని ఆయన అభిప్రాయపడ్డారు.
Latest News: SIR: ఓటరు జాబితాపై రాజకీయ రగడ: పశ్చిమ బెంగాల్ లేకపోవడంపై విమర్శలు
అయితే, ప్రధాని మోదీ ఏపీ రాజకీయాల విషయంలో ఒక కీలకమైన అంశంపై ఎంపీలకు దిశా నిర్దేశం చేశారు. ముఖ్యంగా వైఎస్సార్ కాంగ్రెస్ పార్టీ (వైసీపీ) అధ్యక్షుడు వైఎస్ జగన్ మోహన్ రెడ్డి మరియు ఆయన పార్టీ నాయకులు సోషల్ మీడియాలో చేస్తున్న విమర్శలకు బీజేపీ ఎంపీలు ఎందుకు స్పందించడం లేదని ప్రశ్నించినట్లుగా తెలుస్తోంది. రాష్ట్ర ప్రభుత్వ చర్యలు, కేంద్ర-రాష్ట్ర సహకారంపై వైసీపీ చేస్తున్న దాడులకు, ఆరోపణలకు పార్టీ నేతలు, ఎంపీలు సమర్థవంతంగా కౌంటర్ ఇవ్వాలని ఆయన సూచించారు. సోషల్ మీడియాలో జరుగుతున్న విమర్శలకు బీజేపీ నేతలు, ఎంపీలు మరింత యాక్టివ్గా, దీటుగా స్పందించాల్సిన అవసరం ఉందని మోదీ స్పష్టం చేశారు. ఈ ఆదేశాలు, కూటమి భాగస్వామి టీడీపీపై వైఎస్ఆర్సీపీ చేస్తున్న విమర్శలను ఎదుర్కోవడంలో బీజేపీ కూడా చురుకైన పాత్ర పోషించాల్సిన అవసరాన్ని హైలైట్ చేస్తున్నాయి.
తెలంగాణ బీజేపీ ఎంపీల పనితీరుపై ప్రధాని నరేంద్ర మోదీ తీవ్ర అసంతృప్తిని, ఆగ్రహాన్ని వ్యక్తం చేసినట్లుగా సమాచారం. తెలంగాణలో పార్టీకి మంచి టీమ్ ఉన్నప్పటికీ, ప్రతిపక్ష పాత్రను సమర్థంగా పోషించడంలో విఫలమవుతోందని ఆయన విమర్శించారు. అధికార కాంగ్రెస్ ప్రభుత్వంపై ఎదురయ్యే అంశాలను హైలైట్ చేయడంలో, పార్టీ గ్రాఫ్ను పెంచుకోవడంలో ఎంపీలు, నేతలు సీరియస్గా పని చేయడం లేదని ఆయన అసంతృప్తిని వ్యక్తం చేశారు. తెలంగాణలో బీజేపీకి మంచి అవకాశాలు ఉన్నప్పటికీ, వాటిని సద్వినియోగం చేసుకోవడంలో సమస్యలు ఎదురవుతున్నాయని మోదీ పేర్కొన్నారు. చివరగా, ప్రధాని తెలుగు రాష్ట్రాల ఎంపీలు జాతీయ పరిణామాలపై మరింత యాక్టివ్గా ఉండాలని, ‘వికసిత భారత్’, ‘అమృత్ కాలం’ వంటి కేంద్ర ప్రభుత్వ కార్యక్రమాలను ఇతర రాష్ట్రాల్లోనూ ప్రచారం చేసి, పార్టీ బలోపేతానికి కృషి చేయాలని ఆదేశించారు.
Read hindi news: hindi.vaartha.com
Epaper : epaper.vaartha.com
