లక్నోలోని చౌధరి చరణ్ సింగ్ అంతర్జాతీయ విమానాశ్రయంలో పెద్ద విమాన ప్రమాదం త్రుటిలో తప్పింది. లక్నో నుండి ఢిల్లీకి బయలుదేరిన ఇండిగో విమానం (IndiGo ) (6E-6782) టేకాఫ్ కోసం రన్వేపై వేగంగా వెళ్తుండగా, అనుకోకుండా నెమ్మదించింది. ఈ విమానంలో మెయిన్పురి ఎంపీ డింపుల్ యాదవ్ సహా మొత్తం 151 మంది ప్రయాణికులు ఉన్నారు. ఈ సంఘటనతో ఒక్కసారిగా ప్రయాణికులందరూ తీవ్ర భయాందోళనకు గురయ్యారు.
పైలట్ చాకచక్యంతో ప్రయాణికులకు ఊరట
టేకాఫ్ సమయంలో విమానం నెమ్మదించడం గమనించిన పైలట్ (IndiGo pilot) వెంటనే అప్రమత్తమయ్యారు. ఎలాంటి ప్రమాదం జరగకుండా ఉండేందుకు చాకచక్యంగా ఎమర్జెన్సీ బ్రేకులను ఉపయోగించి విమానాన్ని రన్వే పైనుండే నిలిపివేశారు. దీనితో పెను ప్రమాదం తప్పింది. పైలట్ తీసుకున్న ఈ సకాల నిర్ణయం వల్ల ప్రయాణికులందరూ సురక్షితంగా బయటపడ్డారు. ఈ సంఘటన తర్వాత విమానాన్ని సాంకేతిక తనిఖీ కోసం తీసుకెళ్లారు.
విమానయాన భద్రతపై ప్రశ్నలు
ఈ సంఘటన విమానయాన భద్రతపై మరోసారి ప్రశ్నలు లేవనెత్తుతోంది. టేకాఫ్ సమయంలో విమానం నెమ్మదించడానికి గల కారణాలపై దర్యాప్తు జరుగుతోంది. ప్రయాణీకుల భద్రతకు అత్యధిక ప్రాధాన్యత ఇవ్వాలని, ఇలాంటి సాంకేతిక లోపాలు పునరావృతం కాకుండా చూడాలని అధికారులు సూచించారు. ఈ ఘటనతో ప్రయాణికులు ఊపిరి పీల్చుకున్నప్పటికీ, భవిష్యత్తులో ఇలాంటి సంఘటనలు జరగకుండా ఎయిర్ లైన్స్ సంస్థలు మరింత జాగ్రత్తలు తీసుకోవాలని నిపుణులు కోరుతున్నారు.
