ఆంధ్రప్రదేశ్లోని విద్యార్థులు, ఉపాధ్యాయులకు దసరా (Dasara) సందర్భంగా శుభవార్తను విద్యాశాఖ మంత్రి నారా లోకేశ్ ప్రకటించారు. ఉపాధ్యాయుల అభ్యర్థన మేరకు ఈసారి పండుగ సెలవులను రెండు రోజుల ముందుగానే ప్రారంభించాలని ప్రభుత్వం నిర్ణయించింది. అందువల్ల సెప్టెంబర్ 22వ తేదీ నుంచి అక్టోబర్ 2వ తేదీ వరకు దసరా హాలిడేస్ ఇవ్వబోతున్నట్టు ఆయన తెలిపారు. విద్యాశాఖ అధికారులతో చర్చించి తీసుకున్న ఈ నిర్ణయం విద్యార్థులు, ఉపాధ్యాయులందరికీ ఆనందం కలిగిస్తోంది.
మొదట ప్రకటించిన అకడమిక్ క్యాలెండర్ ప్రకారం దసరా సెలవులు (Dasara Holidays) సెప్టెంబర్ 24 నుంచి అక్టోబర్ 2 వరకు మాత్రమే ఉండేవి. అయితే, ఉపాధ్యాయులు రెండు రోజుల ముందుగానే సెలవులు ఇవ్వాలని కోరడంతో ప్రభుత్వం ఆ అంశంపై సానుకూలంగా స్పందించింది. దీంతో ఇప్పుడు మొత్తం పదకొండు రోజుల పాటు విద్యాసంస్థలు మూసివేయబడనున్నాయి. అదనంగా వచ్చిన రెండు రోజులు ఉపాధ్యాయులకు పండుగ ఏర్పాట్లకు, కుటుంబంతో సమయాన్ని గడపడానికి సౌలభ్యం కల్పించనున్నాయి.
ఈ నిర్ణయం ఉపాధ్యాయులతో పాటు విద్యార్థులకు కూడా శుభవార్తగా మారింది. ముఖ్యంగా గ్రామీణ ప్రాంతాల్లో చదువుతున్న పిల్లలు, పండుగ కోసం ఊళ్లకు వెళ్లే వారు ఎక్కువగా ఉన్నందున అదనపు సెలవులు వారికి ఉపయుక్తమవుతాయి. అలాగే దసరా వేళ రవాణా రద్దీ తగ్గించడంలో కూడా ఈ నిర్ణయం సానుకూల ప్రభావం చూపనుంది. పండుగ ఉత్సాహాన్ని మరింతగా ఆస్వాదించేలా ప్రభుత్వం తీసుకున్న ఈ చర్యను విద్యార్థులు, తల్లిదండ్రులు హర్షం వ్యక్తం చేస్తున్నారు.
