తెలంగాణలో బీసీల హక్కులను పరిరక్షించేందుకు బీఆర్ఎస్ కీలక చర్యలు చేపడుతోంది. స్థానిక సంస్థల్లో బీసీలకు 42% రిజర్వేషన్ అమలు కోసం పోరాడాలని నిర్ణయించింది. ఇందులో భాగంగా, భవిష్యత్తు కార్యాచరణపై చర్చించేందుకు బీసీ ఎమ్మెల్యేలు, ఇతర ప్రజాప్రతినిధులతో కలిసి నేడు సమావేశం నిర్వహించనుంది. ఈ భేటీకి పార్టీ వర్కింగ్ ప్రెసిడెంట్ కేటీఆర్ నేతృత్వం వహించనున్నారు. తెలంగాణ భవన్లో నిర్వహించే ఈ సమావేశంలో కుల గణన సర్వే నివేదిక, 42% రిజర్వేషన్ అమలు, బీసీల సమస్యలు, భవిష్యత్తులో తీసుకోవాల్సిన చర్యలపై కేటీఆర్ పార్టీ నేతలకు దిశానిర్దేశం చేయనున్నారు.
ప్రభుత్వ విధానాల్లో బీసీలకు మరింత ప్రాధాన్యం కల్పించేందుకు బీఆర్ఎస్ నేతలు ప్రత్యేక వ్యూహాన్ని రూపొందిస్తున్నారు. కేంద్ర ప్రభుత్వం బీసీలకు సరైన న్యాయం చేయడం లేదని ఆరోపిస్తూ, రాష్ట్ర స్థాయిలో రిజర్వేషన్ అమలుకు కట్టుబడి ఉంటామని స్పష్టం చేశారు. ఈ సమావేశంపై బీసీ వర్గాల్లో భారీ ఆసక్తి నెలకొంది. 42% రిజర్వేషన్ అమలుకు ప్రభుత్వం ఏ విధంగా ముందుకు వెళ్లనుందన్న దానిపై స్పష్టత రావాల్సి ఉంది. కులగణన సర్వే ఆధారంగా ప్రభుత్వం తగిన నిర్ణయాలు తీసుకుంటుందా? లేదా? అనే దానిపై బీసీ నాయకులు ఉత్కంఠగా ఎదురు చూస్తున్నారు. ఈ సమావేశం అనంతరం, పార్టీ భవిష్యత్తు కార్యాచరణను ప్రకటించే అవకాశం ఉంది. బీసీల రిజర్వేషన్ కోసం ఉద్యమాన్ని మరింత ఉధృతం చేసే దిశగా నిర్ణయాలు తీసుకునే అవకాశం ఉంది. కేటీఆర్ సూచనల ఆధారంగా పార్టీ నేతలు, ఎమ్మెల్యేలు బీసీల సమస్యలపై మరింత దృష్టి సారించనున్నారు.
