Bhagat Singh : వీరి పేర్లు వింటేనే గుండె గర్వంతో నిండిపోతుందన్న మోదీ ,చంద్రబాబు భారత స్వాతంత్ర్య సమరంలో అపురూప Chapter గా నిలిచిపోయిన భగత్ సింగ్, రాజ్ గురు, సుఖ్ దేవ్ల త్యాగాన్ని దేశం ఎన్నటికీ మరచిపోలేదు. వీరు స్వాతంత్ర్యం కోసం పోరాడుతూ ఉరికంబం ఎక్కిన చారిత్రక సంఘటనను గుర్తు చేసుకుంటూ, ఏపీ ముఖ్యమంత్రి చంద్రబాబు నాయుడు వీరికి నివాళులు అర్పించారు. 23 ఏళ్ల చిన్న వయసులోనే వీరు ప్రాణత్యాగం చేసి యువతకు చిరస్మరణీయమైన స్ఫూర్తిగా నిలిచారని ఆయన పేర్కొన్నారు. ఈ అమరవీరుల త్యాగాలను స్మరించుకుంటూ, వారి బాటలో మనం నడవాలని ఆయన పిలుపునిచ్చారు.ప్రధాని నరేంద్ర మోదీ కూడా భగత్ సింగ్, రాజ్ గురు, సుఖ్ దేవ్లకు శ్రద్ధాంజలి ఘటించారు.
వీరి పేర్లు వినగానే ప్రతి భారతీయుడి గుండె గర్వంతో నిండిపోతుందని ఆయన అన్నారు.బ్రిటీష్ పాలకుల అకృత్యాలను ఎదుర్కొంటూ భరతమాత కోసం వీరు పోరాడి అమరులయ్యారని మోదీ పేర్కొన్నారు. దేశం ఈ త్యాగమూర్తులను ఎప్పటికీ గుర్తు పెట్టుకుంటుందని ఆయన తెలిపారు.1931 మార్చి 23న బ్రిటీష్ ప్రభుత్వం భగత్ సింగ్, రాజ్ గురు, సుఖ్ దేవ్లను ఉరి తీయించింది. బ్రిటీష్ అధికారి శాండర్స్ హత్యకేసులోనూ, అసెంబ్లీలో బాంబుల ఘటనలోనూ వీరిపై కేసులు పెట్టారు. వీరి ఉరిశిక్ష భారత స్వాతంత్ర్య పోరాటాన్ని మరింత ఉధృతం చేసింది. వారి త్యాగాలకు గుర్తుగా ప్రతి ఏడాది మార్చి 23న అమరవీరుల దినోత్సవాన్ని నిర్వహిస్తారు. దేశ ప్రజలు ఈ రోజు వీరిని స్మరించి, దేశభక్తిని పునరుద్ధరించుకుంటారు.
