Arabia Kadali : అరేబియా కడలి (అమెజాన్ ప్రైమ్) సిరీస్ రివ్యూ

Anusha | Updated on: Aug 11, 2025 | 2:21 PM

వాట్సాప్‌లో ఫాలో అవండి

సముద్రం, పడవలు, వలలు, అలలతో పోరాటం, ఇవన్నీ జాలరుల జీవితానికి ప్రతిరోజు జరిగే సంగతులే. కానీ ఆ జీవనంలో దాగి ఉన్న కష్టాలు, భావోద్వేగాలు, బతుకుబండిని నెట్టుకునే పోరాటం, మానవ సంబంధాలు, ద్రోహం, ఆశలు, నిరాశలు – ఇవన్నీ తెరపై సహజంగా చూపించడం అంత తేలికైన పని కాదు. అయితే, సత్యదేవ్ – ఆనంది ప్రధానమైన పాత్రలను పోషించిన ‘అరేబియా కడలి’ (Arabian Kadali series) కూడా ఇదే నేపథ్యంలో రూపొందింది. సూర్య కుమార్ దర్శకత్వం వహించిన ఈ సిరీస్, 8 ఎపిసోడ్స్ గా ప్రేక్షకులను పలకరించింది. ఈ నెల 8వ తేదీ నుంచి ‘అమెజాన్ ప్రైమ్’ లో స్ట్రీమింగ్ అవుతోంది. ఈ సిరీస్ కథ ఎలా ఉందనేది ఇప్పుడు చూద్దాం.

కథ

చేపలవాడ – మత్స్యవాడ సముద్రతీరంలో .. పక్కపక్కనే ఉన్న గ్రామాలు. అయితే అక్కడి సముద్రంలో చేపలు పట్టడానికి అనుకూలమైన పరిస్థితులు ఉండవు. జెట్టీ .. ఫిషింగ్ హార్బర్ వస్తే తప్ప చేపల వేట సాధ్యపడదు. అందువలన ఆ గ్రామాల నుంచి జాలరులు గుజరాత్ కి వలస వెళుతూ ఉంటారు. అక్కడి ‘సంగరోల్’ నుంచి వాళ్లకి ఒక ఏజన్సీ బోట్లు ఏర్పాట్లు చేస్తూ ఉంటుంది. మగాళ్లంతా చేపలవేటకు గుజరాత్ (Gujarat) వెళ్లి వచ్చేవరకూ, వారి కుటుంబాలు భయం గుప్పెట్లో బ్రతుకుతుంటాయి. చేపలవాడకి చెందిన బద్రి ( సత్యదేవ్) మత్స్యవాడికి చెందిన గంగ (ఆనంది) ప్రేమించుకుంటూ ఉంటారు. అయితే ఈ రెండు గ్రామాలకి మధ్య పాత పగలు .. ప్రతీకారాలు ఉంటాయి. తమ ఊళ్ల మధ్య గొడవలుపోయి, చేపలవేటలోని ఇబ్బందులు తొలగిపోవడం కోసం గంగ – బద్రి ప్రయత్నిస్తూ ఉంటారు. అయితే బద్రితో గంగ తిరగడం ఆమె తండ్రి నానాజీకి ఎంతమాత్రం నచ్చదు. తన ఊరికి చెందిన శేఖర్ (వంశీకృష్ణ) కి గంగను ఇచ్చి పెళ్లి చేయాలని నిర్ణయించుకుంటాడు.

కథనం

ఈ నేపథ్యంలోనే చేపలవాడ నుంచి బద్రి .. మత్స్యవాడ నుంచి నానాజీ బృందం గుజరాత్ కి వెళతారు. అక్కడి ఏజన్సీవారు ఏర్పాటు చేసిన పాత పడవలలో సముద్రంలోకి వెళతారు. కొంతదూరం వెళ్లిన తరువాత ‘బోట్’లోని సాంకేతిక సమస్యలను గుర్తిస్తారు. అదే సమయంలో తాము పాకిస్థాన్ సముద్రజలాలలోకి వచ్చేశామని గ్రహిస్తారు. వెంటనే బోట్లను వెనక్కి తిప్పుతారు. కానీ అప్పుడే పాకిస్థాన్ నేవీకి దొరికిపోతారు. అక్కడ వాళ్లకి ఎలాంటి పరిస్థితులు ఎదురవుతాయి? అనేది కథ. భారతదేశానికి చెందిన కొంతమంది మత్స్య కారులు, తమకి తెలియకుండానే పాకిస్థాన్ జలాలలోకి ప్రవేశించడం, అక్కడి నేవీ సిబ్బందికి చిక్కడం, పాకిస్థాన్ జైల్లో నానా హింసలకు గురికావడం, ఆ ఊరికి చెందిన ఒక యువతి వారికి కాపాడటానికి ప్రయత్నించడం వంటి కథతో ఇంతకుముందు ‘తండేల్’ సినిమా వచ్చిన సంగతి తెలిసిందే. కాస్త అటు ఇటుగా అదే కథతో రూపొందిన సిరీస్ ఇది.