ఆంధ్రప్రదేశ్లో జిల్లాల పేరు మార్పుపై వైఎస్ షర్మిల తీవ్రంగా స్పందించారు. చంద్రబాబు తన నిర్ణయాలతో పక్షపాతం చూపుతున్నారని, అత్త మీద కోపం దుత్త మీద చూపినట్లు వ్యవహరిస్తున్నారని విమర్శించారు. NTR జిల్లాకు సంబంధించిన పేరును ఎందుకు మార్చలేదని ప్రశ్నించారు.
YSR పేరును ఎందుకు తొలగించారు?
షర్మిల ప్రకారం, జగన్ తన హయాంలో NTR పేరును మార్చినప్పుడు, చంద్రబాబు ప్రతీకార ధోరణితో YSR జిల్లా పేరును మారుస్తున్నారని ఆరోపించారు. ముఖ్యంగా తాడిగడప మున్సిపాలిటీకి YSR పేరును తొలగించడం అన్యాయం అని, దీనిని ఖండిస్తున్నట్లు స్పష్టం చేశారు. YSR జిల్లాను YSR కడప జిల్లాగా మార్చడంలో అభ్యంతరం లేదని పేర్కొన్నారు.
NTR జిల్లా పేరుతో వివాదం ఎందుకు?
షర్మిల తన వ్యాఖ్యల్లో NTR జిల్లా పేరు మార్పుపై చంద్రబాబు ఎందుకు మౌనం పాటిస్తున్నారని ప్రశ్నించారు. “NTR జిల్లా పేరును ‘NTR విజయవాడ’గా లేదా పాత కృష్ణా జిల్లా పేరును ‘NTR కృష్ణా జిల్లా’గా ఎందుకు మార్చలేదు?” అని నిలదీశారు. దీనిపై ప్రభుత్వం క్లారిటీ ఇవ్వాలని ఆమె డిమాండ్ చేశారు.
రాజకీయ కారణాలతోనే మార్పులా?
రాష్ట్రంలో జిల్లాల పేరు మార్పు పూర్తిగా రాజకీయ కుట్ర అని షర్మిల అభిప్రాయపడ్డారు. ప్రతీ అంశాన్ని రాజకీయ లబ్ధి కోసమే వాడుకోవడం తప్ప ప్రజా ప్రయోజనాలను గుర్తించడంలేదని విమర్శించారు. ఇకపై ఏ నిర్ణయం తీసుకున్నా, ప్రజా అభిప్రాయాన్ని గౌరవించాలని ఆమె ప్రభుత్వాన్ని కోరారు.
