ఆంధ్రప్రదేశ్ రాష్ట్రాన్ని పేదరహితం చేయాలన్న లక్ష్యంతో ముఖ్యమంత్రి నారా చంద్రబాబు నాయుడు (Chandrababu Naidu) మరో కీలక నిర్ణయం తీసుకున్నారు. రాష్ట్రంలోని పేద కుటుంబాలను ఆదుకునేందుకు తాను వ్యక్తిగతంగా కొన్ని బంగారు కుటుంబాల (Adoption of golden families)ను దత్తత తీసుకుంటానని ప్రకటించారు. ఈ యజ్ఞంలో తనతో పాటు తన కుటుంబ సభ్యులూ భాగమవుతారని తెలిపారు.పేదరిక నిర్మూలనలో భాగంగా చేపట్టిన పీ4 (P4 – Poverty-free People’s Programme) పై సీఎం చంద్రబాబు సచివాలయంలో సమీక్ష నిర్వహించారు. ఈ కార్యక్రమం ఇప్పుడు ప్రజా ఉద్యమంగా మారిందని చెప్పారు. పేదల సాధికారతే ఈ కూటమి ప్రభుత్వ ప్రధాన లక్ష్యమని ఆయన స్పష్టం చేశారు.
కలెక్టర్లకు కీలక బాధ్యత
పీ4లో కార్పొరేట్ కంపెనీలు, స్వచ్ఛంద సంస్థలు భాగస్వాములవ్వాలని సీఎం ఆకాంక్షించారు. ఇందుకోసం కలెక్టర్లు సమన్వయకర్తలుగా పనిచేయాలన్నారు. గ్రామాన్ని యూనిట్గా తీసుకుని, అక్కడి ఎన్ఆర్ఐలు, పారిశ్రామికవేత్తలు బంగారు కుటుంబాలను దత్తత తీసుకునేలా ప్రోత్సహించాలన్నారు.
ఆగస్టు 15కు లక్ష్యం
ఆగస్టు 15 నాటికి రాష్ట్రవ్యాప్తంగా 15 లక్షల బంగారు కుటుంబాలు మార్గదర్శులు దత్తత తీసుకునేలా చూడాలని సీఎం ఆదేశించారు. ఇప్పటికే 5,74,811 బంగారు కుటుంబాలు దత్తతకు వెళ్లగా, 57,503 మంది మార్గదర్శులుగా నమోదు అయ్యారు.
ఇంకా మార్గదర్శుల అవసరం
లక్ష్యం పూర్తి కావాలంటే మరో 2 లక్షల మార్గదర్శులు అవసరమని అధికారులు సీఎంకు తెలిపారు. ఈ పనిలో పల్నాడు జిల్లా అగ్రస్థానంలో ఉండగా, విశాఖపట్నం జిల్లా చివరి స్థానంలో ఉందని వివరించారు.
ఆటోమేటెడ్ అప్డేట్లు
దత్తత తీసుకున్న కుటుంబాలకు సంబంధించి సమాచారం ఆటోమేటెడ్ సందేశాల రూపంలో అందిస్తామని అధికారులు వెల్లడించారు. ఈ విధానం పేదరిక నిర్మూలనలో పారదర్శకతను తీసుకువస్తుందని చెబుతున్నారు.
సమాజ భాగస్వామ్యం కీలకం
ఈ ప్రయత్నం ప్రజల సహకారం లేకుండా ముందుకెళ్లదని సీఎం అన్నారు. ప్రతి ఒక్కరూ మార్గదర్శిగా ముందుకు రావాలని పిలుపునిచ్చారు. పేదరికానికి చెక్ పెట్టేందుకు ప్రభుత్వం వేసిన ఈ అడుగు, ప్రజల సహకారంతో బంగారు భవిష్యత్తుకు మార్గం వేస్తుందనడంలో ఎలాంటి సందేహం లేదు.
Read Also : Anantha Babu : హైకోర్టులో వైసీపీ ఎమ్మెల్సీ అనంతబాబుకు చుక్కెదురు
