భారతీయ సినీ రంగంలో సూపర్ స్టార్ రజనీకాంత్ 50 ఏళ్ల సుదీర్ఘ సినీ ప్రయాణాన్ని పూర్తి చేసుకున్న సందర్భంగా ఆంధ్రప్రదేశ్ ఉప ముఖ్యమంత్రి పవన్ కళ్యాణ్ (Pawan Kalyan) అభినందనలు తెలిపారు. రజనీకాంత్ సినీ ప్రస్థానం ‘స్వర్ణోత్సవం’ జరుపుకుంటున్న ఈ సందర్భం అరుదైన గౌరవమని ఆయన పేర్కొన్నారు.
వెండి తెరపై అజరామరమైన ప్రభావం
పవన్ కళ్యాణ్ (Pawan Kalyan) మాట్లాడుతూ, ‘‘థియేటర్ స్క్రీన్పై ‘సూపర్ స్టార్ రజని’ (Superstar Rajini) అనే టైటిల్ కనిపించగానే అభిమానులు చేసే సంబరాలు ఎన్నిసార్లు చెన్నైలో చూసాను. తరాలు మారినా రజనీకాంత్ గారి ఇమేజ్, అభిమానుల ఉత్సాహం ఏమాత్రం తగ్గలేదు. ఆ స్థాయి అభిమానులను దక్కించుకున్న అగ్రశ్రేణి నటుడిగా ఆయన 5 దశాబ్దాల ప్రస్థానం విశేషమైంది’’ అని అన్నారు.
ప్రత్యేకమైన నటన, శైలి
రజనీకాంత్ ప్రతినాయకుడి పాత్రలోనైనా, కథానాయకుడి పాత్రలోనైనా తనదైన స్టైల్తో ప్రేక్షకులను ఆకట్టుకున్నారని పవన్ కళ్యాణ్ తెలిపారు. ఆయన నడక, డైలాగ్ డెలివరీ, హావభావాలు ప్రత్యేకతను చాటుతూ కొత్త తరాల ప్రేక్షకులకూ ఆదర్శంగా నిలుస్తున్నాయని పేర్కొన్నారు. ‘‘సినీ ప్రస్థానంలో చెరగని ముద్ర (indelible mark on film industry)వేశారు’’ అని ఆయన ప్రశంసించారు.
నటుడిగా శిఖరాగ్ర స్థాయికి చేరినప్పటికీ రజనీకాంత్ ఆధ్యాత్మిక విషయాలపై, యోగా సాధనపై ప్రత్యేక శ్రద్ధ చూపుతున్నారని పవన్ కళ్యాణ్ గుర్తుచేశారు. మహావతార్ బాబాజీ భక్తుడిగా ఆయన జీవన విధానం ఎంతో మందికి స్ఫూర్తినిస్తోందని తెలిపారు.
భవిష్యత్తుపై ఆకాంక్షలు
‘‘నటుడిగా స్వర్ణోత్సవాన్ని జరుపుకుంటున్న ఈ ఘట్టంలో రజనీకాంత్ గారు మరిన్ని విభిన్న పాత్రలతో ప్రేక్షకులను అలరించాలని కోరుకుంటున్నాను. ఆయురారోగ్యాలతో, సుఖసంతోషాలతో మరింత కాలం సినీ రంగంలో వెలుగొందాలని భగవంతుణ్ణి ప్రార్థిస్తున్నాను’’ అని పవన్ కళ్యాణ్ తన ప్రకటనలో పేర్కొన్నారు.
Read hindi news: hindi.vaartha.com
Read also:
