నీతి ఆయోగ్ (NITI Aayog) పదో పాలక మండలి సమావేశంలో ఆంధ్రప్రదేశ్ సీఎం నారా చంద్రబాబు నాయుడు (Chandrababu) ప్రవేశపెట్టిన అభివృద్ధి ప్రణాళికలు ప్రధానమంత్రి నరేంద్ర మోదీ ప్రశంసలు అందుకున్నాయి. రాష్ట్ర అభివృద్ధికి తీసుకుంటున్న చర్యలు ఇతర రాష్ట్రాలకు మార్గదర్శకంగా నిలుస్తాయని మోదీ అభిప్రాయపడ్డారు. రాష్ట్రంలో చేపట్టిన సంస్కరణలు, పాలనలో నూతనత, ప్రజల భాగస్వామ్యంతో జరుగుతున్న అభివృద్ధి చర్యలపై ఆయన ప్రత్యేకంగా స్పందించారు.
వికసిత భారత్ కోసం విస్తృత చర్చలు
“వికసిత భారత్ @2047” అనే లక్ష్యంతో జరిగిన ఈ సమావేశంలో దేశవ్యాప్తంగా అభివృద్ధిని వేగవంతం చేయాలనే దృక్పథంతో నేతలు చర్చించారు. చంద్రబాబు మాట్లాడుతూ, ఆంధ్రప్రదేశ్ను 2029 నాటికి పేదరికం లేని రాష్ట్రంగా తీర్చిదిద్దాలన్న దార్శనికతతో “స్వర్ణాంధ్ర @2047” ప్రణాళికను రూపొందించామని తెలిపారు. ఇందుకోసం పి4 (ప్రభుత్వం, ప్రైవేటు రంగం, ప్రజలు, భాగస్వామ్యం) మోడల్ను అమలు చేస్తున్నట్లు వివరించారు.
మూడు ఉపబృందాల ప్రతిపాదన
చంద్రబాబు రాష్ట్రాల అభివృద్ధిలో కేంద్రం, నీతి ఆయోగ్తో భాగస్వామ్యాన్ని బలోపేతం చేయడానికి మూడు నిర్దిష్ట ఉపబృందాల ఏర్పాటును ప్రతిపాదించారు. జీడీపీ వృద్ధికి పెట్టుబడులు, తయారీ రంగం, ఉద్యోగ కల్పనకు ప్రోత్సాహం ఇవ్వాల్సిన అవసరం ఉందని, ప్రజాసంఖ్య ప్రయోజనాన్ని సద్వినియోగం చేసుకుంటూనే భవిష్యత్తు సవాళ్లను ఎదుర్కోవడంపై దృష్టి సారించాలని తెలిపారు. అలాగే, సాంకేతిక ఆధారిత పాలన కోసం కృత్రిమ మేధ, డ్రోన్లు, డిజిటల్ వేదికలను వినియోగించి ప్రజలకందించే సేవలను మరింత సమర్థవంతంగా చేయాల్సిన అవసరాన్ని చంద్రబాబు సూచించారు.
Read Also : PBKS vs DC : ఉత్కంఠ పోరులో ఢిల్లీ అద్భుత విజయం
