అమరావతి ఇన్నర్ రింగ్ రోడ్డుపై మంత్రి నారాయణ కీలక వ్యాఖ్యలు

ఆంధ్రప్రదేశ్ పురపాలక శాఖ మంత్రి నారాయణ అమరావతి (Amaravati) రాజధాని ప్రాంతంలో పర్యటించి పనుల పురోగతిని పరిశీలించారు. ఈ సందర్భంగా ఆయన మాట్లాడుతూ గత ప్రభుత్వం తనపై పెట్టిన ఇన్నర్ రింగ్ రోడ్డు (IRR) కేసుపై ఆసక్తికర విషయాలు వెల్లడించారు. 2001లోనే తాను కొనుగోలు చేసిన 60 సెంట్ల సొంత స్థలం ఈ రింగ్ రోడ్డు అలైన్మెంట్‌లో పోయిందని ఆయన వివరించారు. తన భూమిని కోల్పోయినా సరే, గత ప్రభుత్వం ఎలాంటి ఆధారాలు లేకుండా తనపై అక్రమ కేసులు బనాయించిందని మంత్రి మండిపడ్డారు. ఈడుపుగల్లు ప్రాంతంలో ఉన్న తన స్థలంలో నిర్మాణాలు చేపట్టాలని భావించినప్పుడు, అది రోడ్డు మార్గంలో ఉందని సీఆర్డీయే అధికారులు చెప్పారని ఆయన గుర్తు చేశారు.

Minister Narayana’s key comments on Amaravati Inner Ring Road

రాజధానిలో నివాస గృహాల నిర్మాణాలపై మంత్రి సమీక్ష

అమరావతిలోని నేలపాడు ప్రాంతంలో నిర్మిస్తున్న గెజిటెడ్ అధికారులు మరియు ఉద్యోగుల క్వార్టర్లను మంత్రి నారాయణ క్షేత్రస్థాయిలో తనిఖీ చేశారు. మొత్తం 4,026 ఇళ్లకు సంబంధించి అంతర్గత పనులు వేగంగా జరుగుతున్నాయని ఆయన పేర్కొన్నారు. గత ప్రభుత్వ నిర్లక్ష్యం వల్ల పనులు నిలిచిపోయి తీవ్ర నష్టం వాటిల్లిందని, ప్రస్తుతం ఆ అడ్డంకులను తొలగించి పనులు పరుగులు పెట్టిస్తున్నామని చెప్పారు. నవంబర్ వరకు వర్షాల వల్ల కొంత ఆలస్యం జరిగిందని, అయితే ఇప్పుడు ప్రైవేట్ సంస్థలు కూడా తమ నిర్మాణాలను వేగవంతం చేస్తున్నాయని మంత్రి వెల్లడించారు. నాణ్యతతో కూడిన పనులను నిర్ణీత గడువులోగా పూర్తి చేయాలని అధికారులను ఆదేశించారు.

లక్ష్యాలను చేరుకోలేని సంస్థలపై కఠిన చర్యలు తప్పవు

రాజధాని పనుల్లో జాప్యం వహిస్తున్న కాంట్రాక్ట్ సంస్థలపై మంత్రి నారాయణ తీవ్ర ఆగ్రహం వ్యక్తం చేశారు. నిర్ణయించిన లక్ష్యాల ప్రకారం పనులు చేయని పక్షంలో సదరు సంస్థలు తప్పుకోవచ్చని ఆయన స్పష్టం చేశారు. ముఖ్యంగా షాపూర్జీ – పల్లోంజి వంటి పెద్ద సంస్థల మేనేజ్మెంట్‌తో పనుల వేగంపై చర్చిస్తున్నట్లు తెలిపారు. రాబోయే మూడు నెలల్లో ప్రధాన రోడ్ల పనులను పూర్తి చేయడమే లక్ష్యంగా పెట్టుకున్నామని, మరో మూడేళ్లలో పరిపాలనా భవనాలన్నీ అందుబాటులోకి వస్తాయని ధీమా వ్యక్తం చేశారు. మూడు రాజధానుల పేరుతో గత ప్రభుత్వం చేసిన కాలయాపన వల్లే అమరావతి అభివృద్ధి వెనుకబడిందని ఆయన విమర్శించారు.

Read hindi news: hindi.vaartha.com

Epaper: epaper.vaartha.com