Nara Lokesh : లోకేశ్ కీలక ప్రకటనలు, సంస్కరణల వెల్లడి

ఆంధ్రప్రదేశ్‌లో గత ప్రభుత్వ హయాంలో విద్యావ్యవస్థ ఎలా కుంగిపోయిందో తాజాగా మంత్రి నారా లోకేశ్ (Minister Nara Lokesh) ధ్వజమెత్తారు. శనివారం ఆయన మీడియాతో మాట్లాడుతూ, జగన్ రెడ్డి వ్యక్తిగతంగా, ప్రజా జీవితంలోనూ పూర్తిగా విఫలమయ్యారని ఆరోపించారు.పదో తరగతి పేపర్ చోరీ చేసిన వ్యక్తి నుంచి నీతి ఆశించడం తప్పు అంటూ విమర్శలు గుప్పించారు. అప్పట్లో పాఠశాలల్లో పార్టీ రంగులు, జగన్ పేరు తప్ప మరొకటి కనిపించేదే లేదని మండిపడ్డారు.లోకేశ్ అభిప్రాయం ప్రకారం, గత ప్రభుత్వం తీసుకున్న అనర్థక నిర్ణయాల వల్ల విద్యా రంగం తీవ్రంగా దెబ్బతిందని పేర్కొన్నారు. ఇంటర్ విద్యార్థులకు మధ్యాహ్న భోజన పథకం (Meal plan) రద్దు చేయడమే కాక, ఉచిత పుస్తకాల పంపిణీ కూడా నిలిపారు అని అన్నారు.ఉపాధ్యాయులను మద్యం షాపుల వద్ద విధులు చేయించే స్థాయికి దించేసారు అని తీవ్ర స్థాయిలో విమర్శించారు. జీవో 117 వల్ల ప్రభుత్వ పాఠశాలల నుండి 12 లక్షల మంది పిల్లలు ప్రైవేట్ పాఠశాలలవైపు మళ్లారని తెలిపారు.

సీబీఎస్ఈ విధానం, IB కలలు – పైకి ఆలోచనలు, లోపల సిద్ధత లేనిది

“వెయ్యి స్కూల్స్‌లో సీబీఎస్ఈ విధానాన్ని అమలు చేశారంటే, ఉపాధ్యాయులూ, పిల్లలూ సిద్ధంగా ఉన్నారా?” అని ప్రశ్నించారు. తాను మంత్రిగా బాధ్యతలు చేపట్టాక 90 శాతం మంది ఆ పరీక్షల్లో విఫలమయ్యారని వివరించారు.పదో తరగతిలో ఫెయిల్ అయితే, ముఖ్యంగా బాలికల చదువు ఆగిపోయే ప్రమాదం ఉంటుందనీ, అందుకే ఈ విధానాన్ని తాత్కాలికంగా వాయిదా వేశామని చెప్పారు.జగన్ ‘IB విధానం’ తెచ్చారని చెప్పుకుంటూ, దాని అమలుకు ₹5 కోట్లు ఖర్చు చేసినప్పటికీ, అమలయే లేదని విమర్శించారు. “TOEFL బోధించే టీచర్లే లేని పరిస్థితిలో పథకాలు చెప్పడం వెఱ్ఱితనమే” అని ఎద్దేవా చేశారు.

బకాయిలు, అవినీతి, ప్రశ్నపత్రాల బదిలీ – ఘాటు ఆరోపణలు

ఫీజు రీయింబర్స్‌మెంట్‌కు ₹4,500 కోట్లు, స్కూళ్లకు అనేక బకాయిలు వదిలేసి వెళ్లారని ఆరోపించారు. గత హయాంలో టీచర్ బదిలీలకు డబ్బులు తీసుకున్నారన్నది బహిరంగ రహస్యమేనని గుర్తుచేశారు.గ్రూప్-1 పేపర్లను హైలాండ్ రిసార్ట్‌లో వాచ్‌మెన్‌లతో తయారు చేయించారన్న ఆరోపణను కూడా గుర్తు చేశారు.లోకేశ్ మాట్లాడుతూ, “విద్యా రంగాన్ని మళ్లీ గాడిలో పెట్టేందుకు శ్రమిస్తున్నాం” అన్నారు. ఉపాధ్యాయుల బదిలీల్లో రాజకీయ జోక్యాన్ని తొలగించామని, కేజీ నుంచి పీజీ వరకు కొత్త విధానం అమలు చేస్తున్నామని తెలిపారు.పుస్తకాల బరువు తగ్గించామని, విలువలతో కూడిన విద్య అందించాలన్నదే ప్రభుత్వ లక్ష్యమని చెప్పారు. విద్యార్థులకు ఉచిత పుస్తకాలు, మధ్యాహ్న భోజన పథకం తిరిగి తీసుకొచ్చామని చెప్పారు.

జవాబు పత్రాలపై ఆరోపణలకు కౌంటర్

పదో తరగతి పరీక్షల మూల్యాంకనం 99.75 శాతం కచ్చితంగా జరిగిందని, కేవలం 0.25 శాతం మాత్రమే తేడాలు వచ్చాయని వివరించారు. రీ-వెరిఫికేషన్ చేసిన 11,175 స్క్రిప్టుల్లో మార్పులు చేసి విద్యార్థులకు న్యాయం చేశామని తెలిపారు.