ఆంధ్రప్రదేశ్ రాష్ట్ర ఆర్థిక పరిస్థితి మరియు అప్పుల అంశంపై అధికార, ప్రతిపక్షాల మధ్య మాటల యుద్ధం ముదిరింది. మాజీ మంత్రి, వైసీపీ నేత అంబటి రాంబాబు ప్రస్తుత కూటమి ప్రభుత్వంపై చేసిన విమర్శలు రాజకీయ వర్గాల్లో హాట్ టాపిక్గా మారాయి. వైసీపీ ప్రభుత్వ హయాంలో ఐదేళ్ల కాలంలో మొత్తం రూ. 3.32 లక్షల కోట్ల అప్పులు చేస్తే, చంద్రబాబు నాయుడు నేతృత్వంలోని కూటమి ప్రభుత్వం అధికారంలోకి వచ్చిన కేవలం ఏడాదిన్నర కాలంలోనే రూ. 3.02 లక్షల కోట్ల అప్పు చేసిందని అంబటి రాంబాబు ఆరోపించారు. అంటే, గత ప్రభుత్వం ఐదేళ్లలో చేసిన అప్పులో దాదాపు 90 శాతం అప్పును ప్రస్తుత ప్రభుత్వం అతి తక్కువ కాలంలోనే చేసేసిందని ఆయన గణాంకాలను వివరించారు. అప్పుల సేకరణలో చంద్రబాబు ప్రభుత్వం రాకెట్ వేగంతో దూసుకుపోతోందని, ఇది రాష్ట్ర భవిష్యత్తుకు ప్రమాదకరమని ఆయన హెచ్చరించారు.
Central Govt: స్మార్ట్ఫోన్ అప్డేట్స్పై ప్రభుత్వ నియంత్రణ
గతంలో వైసీపీ ప్రభుత్వం సంక్షేమ పథకాల కోసం అప్పులు చేస్తుంటే, రాష్ట్రం త్వరలోనే ‘శ్రీలంక’ అవుతుందని టీడీపీ విమర్శలు చేసేదని అంబటి గుర్తు చేశారు. మరి ఇప్పుడు అంతకంటే వేగంగా చంద్రబాబు అప్పులు చేస్తుంటే రాష్ట్రం ‘సింగపూర్’ అవుతుందా? అని ఆయన ప్రశ్నించారు. గత ప్రభుత్వం అప్పు చేసి నేరుగా పేదల ఖాతాల్లోకి (DBT) డబ్బులు పంపిందని, కానీ ప్రస్తుత ప్రభుత్వం చేస్తున్న అప్పులు ఎటు పోతున్నాయో తెలియడం లేదని ఆయన ఎద్దేవా చేశారు. రాష్ట్ర అప్పుల విషయంలో నాడు చేసిన విమర్శలకు, నేడు చేస్తున్న పనులకు పొంతన లేదని ఆయన మండిపడ్డారు.
ఎన్నికల సమయంలో ‘సూపర్ సిక్స్’ వంటి భారీ హామీలు ఇచ్చిన కూటమి ప్రభుత్వం, అధికారంలోకి వచ్చి ఏడాదిన్నర దాటినా వాటిని పూర్తిస్థాయిలో అమలు చేయలేకపోయిందని అంబటి విమర్శించారు. భారీగా అప్పులు చేస్తున్నప్పటికీ, పేదలకు అందాల్సిన పథకాలు అందడం లేదని, నిరుద్యోగ భృతి వంటి హామీలు అటకెక్కాయని ఆయన ఆరోపించారు. రాష్ట్రం ఆర్థికంగా క్లిష్ట పరిస్థితుల్లో ఉందని చెబుతూనే, మరోవైపు రికార్డు స్థాయిలో అప్పులు చేయడంపై ప్రజలకు సమాధానం చెప్పాలని ఆయన డిమాండ్ చేశారు. ఈ గణాంకాల యుద్ధం రాబోయే రోజుల్లో ఏపీ అసెంబ్లీలో కూడా చర్చకు వచ్చే అవకాశం ఉంది.
