AP: ఈసారి ముందుగానే పింఛన్ల పంపిణీ

ఆంధ్రప్రదేశ్‌లో పింఛన్ తీసుకుంటున్న లబ్ధిదారులకు రాష్ట్ర ప్రభుత్వం శుభవార్త చెప్పింది. ఫిబ్రవరి నెలకు సంబంధించిన పింఛన్ డబ్బులను ఈసారి ముందుగానే పంపిణీ చేయాలని నిర్ణయించింది. సాధారణంగా ప్రతి నెల ఒకటో తేదీన పింఛన్ ఇస్తారు. కానీ ఈసారి ఫిబ్రవరి 1కు బదులుగా జనవరి 31వ తేదీనే లబ్ధిదారుల ఇంటి వద్ద పింఛన్ అందించనున్నారు. ఈ నిర్ణయంతో వృద్ధులు, దివ్యాంగులు, వితంతువులకు పెద్ద ఊరట లభించింది. అధికారులు ఇప్పటికే ఏర్పాట్లు ప్రారంభించారు. గ్రామ, వార్డు సచివాలయాల ద్వారా పింఛన్ పంపిణీ జరుగనుంది.

This time, pensions will be distributed earlier

జనవరి 30న నగదు సిద్ధం – సచివాలయాలకు ఆదేశాల

పింఛన్ పంపిణీ సజావుగా జరిగేందుకు ప్రభుత్వం ముందస్తు చర్యలు చేపట్టింది. జనవరి 30వ తేదీన గ్రామ, వార్డు సచివాలయ ఉద్యోగులు బ్యాంకుల నుంచి నగదు తీసుకోవాలని స్పష్టమైన ఆదేశాలు ఇచ్చింది. ఆ నగదును మరుసటి రోజు అంటే జనవరి 31న లబ్ధిదారులకు పంపిణీ చేయనున్నారు. ఏన్టీఆర్ భరోసా పథకం కింద ఈ పింఛన్లు అందుతున్న విషయం తెలిసిందే. ప్రభుత్వం తీసుకున్న ఈ నిర్ణయం వల్ల లబ్ధిదారులు ఆలస్యం లేకుండా పింఛన్ పొందే అవకాశం ఏర్పడింది.

ఈసారి ముందుగా ఎందుకిచ్చారు?

ఈసారి పింఛన్ తేదీ మారడానికి స్పష్టమైన కారణం ఉందని అధికారులు తెలిపారు. ఫిబ్రవరి 1వ తేదీన రాష్ట్ర వార్షిక బడ్జెట్‌ను శాసనసభలో ప్రవేశపెట్టనున్నారు. అదే రోజు ఆదివారం కావడంతో సచివాలయ సిబ్బందితో పింఛన్ పంపిణీ చేయడం కష్టమవుతుంది. అందుకే ఒక రోజు ముందుగానే పింఛన్ ఇవ్వాలని ప్రభుత్వం నిర్ణయించింది. ఇదే మొదటిసారి కాదు. గతంలో కూడా సెలవులు లేదా ప్రత్యేక సందర్భాల్లో ప్రభుత్వం పింఛన్లను ముందుగా పంపిణీ చేసింది. ఇటీవల జనవరి 1 న్యూ ఇయర్ కారణంగా డిసెంబర్ 31న పింఛన్ ఇచ్చిన విషయం తెలిసిందే.

లైఫ్ సర్టిఫికెట్ తప్పనిసరి – గడువు ఇదే

ఇదే సమయంలో పింఛనుదారుల కోసం ప్రభుత్వం మరో కీలక సూచన చేసింది. రాష్ట్ర ప్రభుత్వ పెన్షనర్లు అందరూ 2026 జనవరి 1 నుంచి 2026 ఫిబ్రవరి 28 లోపు లైఫ్ సర్టిఫికెట్ సమర్పించాలి. జీవన్ ప్రామాణ్ ఫేస్ యాప్ ద్వారా సంబంధిత ఉప ఖజానా కార్యాలయంలో ఇది చేయవచ్చు. బయోమెట్రిక్ సమస్యలు ఉన్నవారు, అనారోగ్యంతో ఇంటికే పరిమితమైన వారు తమ వివరాలు ఖజానా కార్యాలయానికి తెలియజేయాలి. అప్పుడు సిబ్బంది నేరుగా వారి ఇంటికే వచ్చి ధృవీకరణ చేస్తారు.

Read hindi news: hindi.vaartha.com

Epaper: epaper.vaartha.com