AP: ఓ సాధారణ మహిళగా RTC లో ప్రయాణించిన నారా భువనేశ్వరి

కుప్పం పర్యటనలో(AP) నారా భువనేశ్వరి సాధారణ మహిళలా వ్యవహరించి అందరినీ ఆకట్టుకున్నారు. రాష్ట్ర ప్రభుత్వం అమలు చేస్తున్న స్త్రీ శక్తి ఉచిత బస్సు ప్రయాణ పథకం ఎలా పనిచేస్తుందో స్వయంగా తెలుసుకోవడానికి ఆమె ఆర్టీసీ(RTC) బస్సులో ప్రయాణం చేశారు.
శాంతిపురం నివాసం నుంచి తుమ్మిసివరకు వెళ్లేందుకు బస్సులో ఎక్కిన భువనేశ్వరి, మిగతా మహిళల మాదిరిగానే తన ఆధార్ కార్డును కండక్టర్‌కి చూపించి ఉచిత టికెట్ పొందారు. ఈ ప్రయాణంలో సహప్రయాణిక మహిళలతో స్నేహపూర్వకంగా మాట్లాడి, పథకం వల్ల వారికి కలుగుతున్న లాభాల గురించి ఆరా తీశారు. మహిళలు ప్రభుత్వ పథకం తమకు ఎంతో మేలు చేసిందని చెప్పగా ఆమె ఆసక్తిగా విన్నారు.

జలహారతి కార్యక్రమంలో భువనేశ్వరి పాల్గొని ప్రత్యేక పూజలు

తుమ్మిసి పెద్ద చెరువు వద్ద నిర్వహించిన జలహారతి కార్యక్రమంలో భువనేశ్వరి పాల్గొని ప్రత్యేక పూజలు చేశారు. ఈ కార్యక్రమంలో పాల్గొనడం తనకు ఒక విశిష్ట అనుభూతి కలిగించిందని ఆమె తెలిపారు. తర్వాత మాట్లాడిన ఆమె, కుప్పం(AP) ప్రాంతానికి తాగు మరియు సాగునీటి సమస్యల నుండి విముక్తి కలిగించేందుకు చంద్రబాబు తీసుకున్న కృషిని గుర్తుచేశారు.

కృష్ణా జలాలను కుప్పం ప్రాంతానికి చేరవేసిన దౌత్యం ఆయనదేనని ఆమె పేర్కొన్నారు. అంతేకాకుండా కుప్పం పరిశ్రమీకరణకు కూడా చంద్రబాబు దారులు వేసారన్నారు. సుమారు రూ. 23 వేల కోట్ల పెట్టుబడులతో ఏడు పరిశ్రమలు ఈ ప్రాంతానికి వచ్చినట్లు, అందులో మూడు ప్రత్యేకంగా మహిళల ఉపాధి కోసం కేటాయించబడినట్లు తెలిపారు. పర్యాటక రంగం అభివృద్ధికీ ప్రాధాన్యం ఇస్తున్నారని, కుప్పం ప్రజల ఆశీస్సులు ఎల్లప్పుడూ చంద్రబాబుతో ఉంటాయని ఆమె ఆకాంక్షించారు.