మయన్మార్ (Myanmar) లోని సగయింగ్ ప్రాంతంలో జరిగిన వైమానిక దాడి తీవ్ర విషాదాన్ని మిగిల్చింది. శాంతియుతంగా ఉండాల్సిన బౌద్ధారామంపై సైన్యం దాడి చేయడంతో 23 మంది అక్కడికక్కడే ప్రాణాలు కోల్పోయారు (23 people lost their lives on the spot) . ఈ దాడిలో 30 మందికి పైగా గాయపడినట్లు స్థానిక మీడియా వెల్లడించింది. బాధితుల్లో పది మందికి పైగా పరిస్థితి అత్యంత విషమంగా ఉన్నట్లు తెలుస్తోంది.తిరుగుబాటుదారుల నేతల సమాచారం ప్రకారం, దాడి జరిగిన బౌద్ధారామంలో చుట్టుపక్కల గ్రామాల నుంచి దాదాపు 150 మంది శరణార్థులు ఉన్నారు. వారిలో ఎక్కువ మంది మహిళలు, చిన్నారులే. ఇది పక్కా నివాస స్థలం కాకపోయినా, భద్రత కోసం అక్కడ తలదాచుకున్నవారు, ఈ దాడికి బలయ్యారు.
సైన్యం ఇప్పటికీ మౌనం పాటిస్తోంది
ఈ దాడిపై మయన్మార్ మిలటరీ ఇప్పటి వరకు ఏ విధమైన అధికారిక ప్రకటన చేయలేదు. అయినప్పటికీ, స్థానికంగా ఉండే ప్రజలు, తిరుగుబాటుదారులు దీనిని ప్రతీకార దాడిగా అభివర్ణిస్తున్నారు.2021లో అంగ్ సాన్ సూకీ ప్రభుత్వాన్ని సైన్యం తొలగించినప్పటి నుంచి మయన్మార్లో పరిస్థితులు అశాంతిగా మారాయి. ప్రజలు మొదట్లో శాంతియుత నిరసనలతో స్పందించగా, తర్వాత సైనిక దాడులు, అరెస్టులు, హింసాత్మక ఘటనలు దేశాన్ని తలకిందులు చేశాయి.
ఆయుధాల వైపు మొగ్గిన తిరుగుబాటుదారులు
నిరసనలను అణిచివేస్తూ ముందుకెళ్లిన సైన్యం తీరు వల్లే తిరుగుబాటుదారులు ఆయుధాలకు మొగ్గు చూపారు. ప్రస్తుతం దేశం అంతర్యుద్ధ పరిస్థితుల్లో చిక్కుకుంది. ప్రతి రోజు ఎక్కడో ఒకచోట పౌరులే బలైపోతున్నారు.ఈ దాడి మయన్మార్లో పరిస్థితి ఎంత దారుణంగా ఉందో చాటుతోంది. శరణార్థులకు ఆశ్రయం కల్పించే బౌద్ధ మఠాలు కూడా గులికల లక్ష్యంగా మారుతున్నాయి. మానవ హక్కుల సంస్థలు ఈ ఘటనపై అంతర్జాతీయ దర్యాప్తు జరపాలని డిమాండ్ చేస్తోంది.
Read Also : Telangana government : నేటి నుంచి మహిళా సంఘాల ఖాతాల్లో నిధుల జమ
