NTR : 'డ్రాగన్' అప్డేట్ తో జోష్ నింపిన ఎన్టీఆర్

చాలా కాలం తర్వాత పబ్లిక్ వేదికపై కనిపించిన జూనియర్ ఎన్టీఆర్, బెంగళూరులోని కిమ్స్ (KIMS) ఆసుపత్రి స్పెషాలిటీ బ్లాక్‌ను ప్రారంభించి అభిమానుల్లో ఉత్సాహం నింపారు. ఈ సందర్భంగా తారక్ మాట్లాడుతూ.. కర్ణాటకతో తనకున్న అనుబంధాన్ని గుర్తు చేసుకున్నారు. 1983 మార్చిలో తన తాతగారు ఎన్టీఆర్ ఇక్కడ శంకుస్థాపన చేసిన విషయాన్ని ప్రస్తావిస్తూ, మళ్ళీ ఇన్నేళ్లకు అదే మార్చి నెలలో తాను ఇక్కడికి రావడం తన పూర్వజన్మ సుకృతమని భావోద్వేగానికి లోనయ్యారు. “ఇక్కడికి వస్తే మా అమ్మమ్మగారి ఇంటికి వచ్చినట్లే ఉంటుంది” అని చెబుతూ కన్నడ ప్రజల మనసు గెలుచుకున్నారు. తాతగారి ఆశీస్సులు, అభిమానుల ప్రేమే తనను ఈ స్థాయికి చేర్చాయని ఆయన కృతజ్ఞతలు తెలిపారు.

ఎన్టీఆర్ ఎక్కడికి వెళ్లినా వినిపించే ‘సీఎం సీఎం’ నినాదాలు బెంగళూరులోనూ మార్మోగాయి. ఈ క్రమంలో 25 ఏళ్ల తర్వాత ఎన్టీఆర్ ఎలా ఉంటారు? అని డాక్టర్ గురువారెడ్డి అడిగిన ప్రశ్నకు తారక్ అత్యంత చాకచక్యంగా సమాధానమిచ్చారు. రాజకీయ కోణంలో స్పందించకుండా, కేవలం తన వయసును ఉద్దేశించి “67 అవుతాను” అని చెప్పి అక్కడున్న వారందరినీ ఆశ్చర్యపరిచారు. ఇక ఒకవేళ తారక్ సినిమాల్లోకి రాకుండా డాక్టర్ అయి ఉంటే ఏ విభాగం ఎంచుకునేవారు అన్న ప్రశ్నకు.. తనకు పిల్లలంటే చాలా ఇష్టమని, అందుకే “పీడియాట్రిషియన్” (పిల్లల వైద్యుడు) అయ్యేవాడినని మనసులో మాట బయటపెట్టారు. ఇదే క్రమంలో ప్రతి ఒక్కరూ వాహనాలు నడిపేటప్పుడు జాగ్రత్తగా ఉండాలని తన అభిమానులకు ఎప్పటిలాగే హితవు పలికారు.

ప్రస్తుతం ఎన్టీఆర్ లుక్ సోషల్ మీడియాలో హాట్ టాపిక్‌గా మారింది. ప్రశాంత్ నీల్ దర్శకత్వంలో తెరకెక్కనున్న భారీ యాక్షన్ చిత్రం ‘డ్రాగన్’ కోసం తారక్ పూర్తిగా మేకోవర్ అయ్యారు. గుబురు గడ్డం, చెవికి పోగుతో ఎంతో స్టైలిష్‌గా, లీన్‌గా కనిపిస్తున్న తారక్‌ను చూసి అభిమానులు మురిసిపోతున్నారు. ఈ చిత్రంలో ఎన్టీఆర్ సరసన రుక్మిణీ వసంత్ నటిస్తుండగా, అనిల్ కపూర్, టోవినో థామస్ వంటి దిగ్గజ నటులు కీలక పాత్రలు పోషిస్తున్నారు. మే 20న తారక్ పుట్టినరోజు సందర్భంగా ఈ సినిమా టైటిల్ టీజర్ మరియు ఫస్ట్ లుక్ వచ్చే అవకాశం ఉండటంతో అంచనాలు ఆకాశాన్ని తాకుతున్నాయి. దీని తర్వాత ‘దేవర 2’ మరియు త్రివిక్రమ్ సినిమాలతో ఎన్టీఆర్ బాక్సాఫీస్ వద్ద సునామీ సృష్టించడానికి సిద్ధమవుతున్నారు.