Nagarkurnool Minor Girl Delivery: నాగర్కర్నూల్ జిల్లా కేంద్రంలో సభ్య సమాజం తలదించుకునే అమానుష ఘటన వెలుగుచూసింది. ఓ మైనర్ బాలిక ప్రైవేట్ ఆసుపత్రి బాత్రూంలో పండంటి మగబిడ్డకు జన్మనివ్వగా, బాలిక వెంట వచ్చిన తల్లి ఆ పసికందును చెత్తబుట్టిలో పడేసిన ఉదంతం స్థానికంగా తీవ్ర సంచలనం రేపింది.
Read Also: Chittoor Crime: రూ. 2 లక్షల కోసం స్నేహితుడి హత్య
స్కానింగ్ సెంటర్లో ప్రసవం
కొల్లాపూర్ నియోజకవర్గంలోని ఒక గ్రామానికి చెందిన 16 ఏళ్ల బాలిక, ప్రస్తుతం జిల్లాలోని ఒక కేజీబీవీ (KGBV) పాఠశాలలో ఇంటర్ ప్రథమ సంవత్సరం చదువుతోంది. కడుపునొప్పిగా ఉండటంతో సోమవారం తన తల్లితో కలిసి జిల్లా కేంద్రంలోని ఓ ప్రైవేట్ ఆసుపత్రికి వచ్చింది. వైద్యుల సూచన మేరకు స్కానింగ్ కోసం వెళ్లిన సమయంలో ఆమెకు పురిటి నొప్పులు అధికమయ్యాయి. దీంతో వెంట వచ్చిన తల్లి ఆమెను పక్కనే ఉన్న బాత్రూంలోకి తీసుకెళ్లగా, అక్కడే బాలిక మగబిడ్డకు జన్మనిచ్చింది.
చెత్తబుట్టిలో పసికందు
అయితే, విషయం బయటపడకుండా ఉండేందుకు తల్లి అప్పుడే పుట్టిన పసికందును బాత్రూం పక్కనే ఉన్న చెత్తబుట్టిలో పడేసింది. గమనించిన ఆసుపత్రి సిబ్బంది వెంటనే అప్రమత్తమై పోలీసులకు సమాచారం అందించారు. ఘటనా స్థలానికి చేరుకున్న పోలీసులు నవజాత శిశువును, మైనర్ తల్లిని వెంటనే జిల్లా ప్రభుత్వ జనరల్ ఆసుపత్రికి తరలించారు. ప్రస్తుతం తల్లి, బిడ్డ ఇద్దరూ క్షేమంగా ఉన్నారని వైద్యులు వెల్లడించారు.
Nagarkurnool Minor Girl Delivery: పరీక్షలు రాసిన గంటల్లోనే
ఆశ్చర్యకరమైన విషయం ఏమిటంటే, సదరు బాలిక సోమవారం ఉదయం ఇంటర్మీడియట్ వార్షిక పరీక్ష కూడా రాసినట్లు తెలిసింది. పరీక్ష రాసిన కొద్ది గంటల్లోనే ఈ ప్రసవం జరగడం గమనార్హం. ఈ విషయం తెలుసుకున్న భరోసా కేంద్రం ప్రతినిధులు, శిశు సంరక్షణ విభాగం అధికారులు ఆసుపత్రికి చేరుకుని వివరాలు సేకరించారు. మైనర్ గర్భం దాల్చడానికి కారణమైన వ్యక్తిపై పోక్సో (POCSO) చట్టం కింద కేసు నమోదు చేసేందుకు పోలీసులు విచారణ వేగవంతం చేశారు.
Read hindi news: hindi.vaartha.com
Epaper: epaper.vaartha.com
Read Also:
