Tirupati: తిరుమల శ్రీవారి ఆలయానికి వచ్చే భక్తులకు తిరుమల తిరుపతి దేవస్థానాలు (టీటీడీ) కీలక ప్రకటన విడుదల చేసింది. ఈ నెల చివర్లో శ్రీవారి వార్షిక తెప్పోత్సవాలు జరగనున్న నేపథ్యంలో పలు సేవలు, సౌకర్యాల్లో మార్పులు చేయనున్నట్లు టీటీడీ తెలిపింది. భక్తులు అసౌకర్యానికి గురి కాకుండా ముందుగానే సమాచారం అందించేందుకు ఈ అలర్ట్ జారీ చేసినట్లు అధికారులు వెల్లడించారు.
Read Also: TTD: మే నెల దర్శన కోటా విడుదల వివరాలు
ఫిబ్రవరి 26 నుంచి మార్చి 2 వరకు తిరుమలలో శ్రీవారి వార్షిక తెప్పోత్సవాలు ఘనంగా నిర్వహించనున్నారు. ఈ నేపథ్యంలో ఇప్పటికే ఏర్పాట్లను ప్రారంభించిన టీటీడీ, అధికారులతో ప్రత్యేక సమీక్ష సమావేశం నిర్వహించింది. శ్రీ పద్మావతి వసతి గృహంలోని సుధర్మ సమావేశ మందిరంలో అదనపు ఈవో వెంకయ్య చౌదరి అధికారులతో సమావేశమై ఏర్పాట్లపై పలు సూచనలు చేశారు. తెప్పోత్సవాల సందర్భంగా పుష్కరిణిలో నీటి మట్టం సరిపడేలా చర్యలు తీసుకోవాలని, ఫ్లోటింగ్ వేదికపై ఆకర్షణీయమైన విద్యుత్ దీపాల అలంకరణ ఏర్పాటు చేయాలని సూచించారు. వరాహస్వామి ఆలయం పరిసరాలు, నాలుగు మాడ వీధుల వెంట పండళ్ల నిర్మాణం చేయాలని, భక్తులకు సమాచారం అందించేందుకు పబ్లిక్ అడ్రస్ సిస్టమ్ ఏర్పాటు చేయాలని అధికారులకు ఆదేశించారు.
ఈ సేవలు నిలిపివేత
తెప్పోత్సవాల నేపథ్యంలో ఫిబ్రవరి 20 నుంచి మార్చి 5 వరకు పుష్కరిణిలో భక్తులు పుణ్యస్నానం చేయడాన్ని టీటీడీ నిలిపివేయనుంది. ఈ ప్రాంతంలో అదనపు భద్రతా చర్యలు చేపట్టనున్నారు. అలాగే ఫిబ్రవరి 26, 27 తేదీల్లో సహస్ర దీపాలంకార సేవలను, ఫిబ్రవరి 28, మార్చి 1, 2 తేదీల్లో ఆర్జిత బ్రహ్మోత్సవ సేవలు మరియు సహస్ర దీపాలంకార సేవలను రద్దు చేస్తున్నట్లు టీటీడీ ప్రకటించింది.
చంద్రగ్రహణం రోజు ఆలయం మూసివేత
మార్చి 3న చంద్రగ్రహణం కారణంగా శ్రీవారి ఆలయాన్ని ఉదయం 9 గంటల నుంచి సాయంత్రం 7.30 గంటల వరకు మూసివేయనున్నారు. ఈ సమయంలో అన్ని దర్శనాలు నిలిపివేస్తారు. అనంతరం రాత్రి 8.30 గంటల నుంచి భక్తులకు దర్శనానికి అనుమతి ఇస్తారు. చంద్రగ్రహణం రోజున ఉదయం 9 గంటల తర్వాత అన్నప్రసాదం పంపిణీ నిలిపివేస్తారు. అయితే క్యూలైన్లు మరియు సీఆర్వో కార్యాలయం వద్ద భక్తులకు పులిహోర ప్యాకెట్లు పంపిణీ చేయనున్నట్లు టీటీడీ తెలిపింది. భక్తులు ఈ మార్పులను గమనించి ముందుగానే ప్రయాణ, దర్శన ఏర్పాట్లు చేసుకోవాలని టీటీడీ సూచించింది. మార్చి నెలకు సంబంధించిన దర్శనం టికెట్లను త్వరలో ఆన్లైన్లో విడుదల చేయనున్నట్లు అధికారులు తెలిపారు.
Read hindi news: hindi.vaartha.com
Read Also Epaper : epaper.vaartha.com
Read Also:
