ప్రముఖ ఈ-కామర్స్ సంస్థ అమెజాన్కు చెందిన డిజిటల్ చెల్లింపుల విభాగం అమెజాన్ పే(Amazon Pay) తన వినియోగదారుల కోసం మరో కొత్త ఆర్థిక సేవను అందుబాటులోకి తీసుకొచ్చింది. ఇకపై వినియోగదారులు అమెజాన్ పే యాప్ ద్వారానే ఫిక్స్డ్ డిపాజిట్లు (FDs) చేసుకునే అవకాశం పొందనున్నారు. ఈ ఎఫ్డీలపై ఏటా గరిష్ఠంగా 8 శాతం వరకు వడ్డీ లభిస్తుందని సంస్థ ప్రకటించింది.
Read also: Layoffs: పెరుగుతున్న క్వయెట్ పైరింగ్.. ఉద్యోగుల్లో పెరుగుతున్న టెన్షన్
ఈ సేవను అందించేందుకు అమెజాన్ పే, శివాలిక్ స్మాల్ ఫైనాన్స్ బ్యాంక్, సూర్యోదయ స్మాల్ ఫైనాన్స్ బ్యాంక్, శ్రీరామ్ ఫైనాన్స్ వంటి బ్యాంకులు, ఆర్థిక సంస్థలతో భాగస్వామ్యం కుదుర్చుకుంది. వినియోగదారులు కేవలం రూ.1,000 కనీస మొత్తంతోనే ఎఫ్డీ ప్రారంభించవచ్చు. అదనపు పత్రాలు సమర్పించాల్సిన అవసరం లేకుండా, పూర్తిగా డిజిటల్ విధానంలో ఈ పెట్టుబడిని చేయవచ్చు. అమెజాన్ పే యాప్లోనే వివిధ బ్యాంకులు అందిస్తున్న వడ్డీ రేట్లను పోల్చి చూసి, తాము కోరుకున్న ఆప్షన్ను ఎంచుకునే సౌకర్యం ఉంది. ఇందుకోసం ప్రత్యేకంగా సేవింగ్స్ అకౌంట్ తెరవాల్సిన అవసరం కూడా లేదని సంస్థ స్పష్టం చేసింది.
శ్రీరామ్ ఫైనాన్స్లో(Amazon Pay) మహిళా పెట్టుబడిదారులకు 0.5 శాతం అదనపు వడ్డీ, అలాగే అన్ని భాగస్వామ్య బ్యాంకుల్లో సీనియర్ సిటిజన్లకు ప్రత్యేక వడ్డీ ప్రయోజనం అందనుంది. బ్యాంక్ ఎఫ్డీలపై డిపాజిట్ ఇన్సూరెన్స్ అండ్ క్రెడిట్ గ్యారెంటీ కార్పొరేషన్ (DICGC) ద్వారా రూ.5 లక్షల వరకు బీమా రక్షణ ఉంటుందని అమెజాన్ పే తెలిపింది. భారతదేశంలో ఫిక్స్డ్ ఇన్కమ్ పెట్టుబడులకు మంచి ఆదరణ ఉందని, ఈ కొత్త సేవ ద్వారా వినియోగదారులకు మెరుగైన రాబడితో పాటు విస్తృత ఎంపికలు అందిస్తున్నామని అమెజాన్ పే సీఈఓ వికాస్ బన్సాల్ వెల్లడించారు. ఇప్పటికే యూపీఐ, బిల్ చెల్లింపుల సేవలతో ముందున్న అమెజాన్ పే, ఇప్పుడు పెట్టుబడి సేవలను కూడా జోడించి తన ఆర్థిక సేవల విస్తృతిని మరింత పెంచుకుంటోంది.
Read hindi news:hindi.vaartha.com
Epaper: epaper.vaartha.com
Read also:
