2026 నూతన సంవత్సర వేడుకల ఉత్సాహంలో ఉన్న స్విట్జర్లాండ్లో ఒక్కసారిగా విషాదం అలముకుంది. ప్రపంచ ప్రఖ్యాతి గాంచిన లగ్జరీ ఆల్పైన్ స్కీ రిసార్ట్ పట్టణం క్రాన్స్ మోంటానా (Crans-Montana) లోని ఒక ప్రముఖ బార్లో భారీ పేలుడు సంభవించింది. స్థానిక కాలమానం ప్రకారం గురువారం తెల్లవారుజామున సుమారు 1:30 గంటలకు ‘లే కాన్స్టెలేషన్’ (Le Constellation) అనే బార్లో ఈ ప్రమాదం జరిగింది. కొత్త ఏడాదికి స్వాగతం పలుకుతూ పర్యాటకులు, స్థానికులు వేడుకల్లో మునిగిపోయిన సమయంలో ఈ పేలుడు సంభవించడంతో అక్కడ హాహాకారాలు మిన్నంటాయి.
TG: కొత్త సంవత్సరంలో పోలీసులకు ప్రభుత్వం ప్రకటించిన పతకాలు
ఈ పేలుడు ధాటికి బార్ ఉన్న భవనం మంటల్లో చిక్కుకుంది. సమాచారం అందుకున్న వెంటనే స్విస్ పోలీసులు, అగ్నిమాపక సిబ్బంది మరియు ఎయిర్-గ్లేసియర్స్ హెలికాప్టర్లు ఘటనాస్థలికి చేరుకున్నాయి. ప్రాథమిక సమాచారం ప్రకారం పలువురు మరణించినట్లు మరియు అనేక మంది తీవ్రంగా గాయపడినట్లు వలైస్ కాంటన్ పోలీసులు ధృవీకరించారు. క్షతగాత్రులను వెంటనే సమీపంలోని ఆసుపత్రులకు తరలించారు. పేలుడు సమయంలో బార్లో 100 మందికి పైగా ఉన్నట్లు తెలుస్తోంది, దీనివల్ల మృతుల సంఖ్య పెరిగే అవకాశం ఉందని అధికారులు ఆందోళన వ్యక్తం చేస్తున్నారు. రెస్క్యూ ఆపరేషన్ ఇంకా కొనసాగుతోంది.
ఈ ఘోర ప్రమాదానికి గల ఖచ్చితమైన కారణాలు ఇంకా తెలియాల్సి ఉంది. నూతన సంవత్సర వేడుకల వేళ కాల్చిన బాణసంచా (Fireworks) ప్రమాదవశాత్తూ పేలడం వల్ల ఈ ఘటన జరిగిందా? లేక గ్యాస్ లీకేజీ వంటి ఇతర సాంకేతిక లోపాలు ఉన్నాయా? అనే కోణంలో పోలీసులు దర్యాప్తు చేస్తున్నారు. సంఘటన స్థలాన్ని క్లోజ్డ్ సర్క్యూట్ కెమెరాల ద్వారా మరియు ప్రత్యక్ష సాక్షుల నుంచి సేకరించిన సమాచారం ద్వారా విశ్లేషిస్తున్నారు. ఈ ఘటన నేపథ్యంలో స్విట్జర్లాండ్లోని ఇతర పర్యాటక ప్రాంతాల్లో భద్రతను కట్టుదిట్టం చేశారు. బాధితుల బంధువుల కోసం ప్రత్యేక హెల్ప్లైన్ నంబర్లను కూడా ఏర్పాటు చేశారు.
Read hindi news: hindi.vaartha.com
Epaper : epaper.vaartha.com
