నందమూరి బాలకృష్ణ తన కెరీర్లోనే మొట్టమొదటిసారిగా పాన్ ఇండియా ఆడియన్స్ను లక్ష్యంగా చేసుకుని ‘అఖండ 2: తాండవం’ చిత్రంతో సిద్ధమవుతున్నారు. ఈ చిత్రం తెలుగుతో పాటు తమిళం, కన్నడ, మలయాళం, హిందీ భాషల్లో 2D మరియు 3D ఫార్మాట్లలో విడుదల కానుంది. ఈ నేపథ్యంలో చిత్ర బృందం దేశవ్యాప్తంగా విస్తృత ప్రచార కార్యక్రమాలను నిర్వహిస్తోంది. ఇప్పటికే ముంబై, చిక్కబళ్లాపుర (కర్ణాటక), హైదరాబాద్, విశాఖపట్నం వంటి ప్రధాన నగరాలలో ప్రమోషన్స్ పూర్తి చేసుకున్న బాలకృష్ణ, తాజాగా చెన్నైలో మీడియా సమావేశాన్ని నిర్వహించారు. ఈ ప్రెస్ మీట్లో బాలయ్య తమిళంలో మాట్లాడి అందరినీ ఆకట్టుకున్నారు. ఈ సందర్భంగా ఆయన చేసిన ‘మద్రాస్ నా జన్మ భూమి, తెలంగాణ నా కర్మ భూమి, ఆంధ్ర నా ఆత్మ భూమి’ అనే వ్యాఖ్యలు అభిమానులను ఆకట్టుకున్నాయి. మద్రాస్తో తనకు ఉన్న అనుబంధాన్ని గుర్తుచేసుకుంటూ, దివంగత తమిళ నటుల గొప్పదనాన్ని కొనియాడారు.
బాలకృష్ణ ఈ సందర్భంగా తన సుదీర్ఘ సినీ ప్రయాణం గురించి మాట్లాడారు. ఇండస్ట్రీలో 50 ఏళ్లు పూర్తి చేసుకున్నందుకు గర్వంగా ఉందని, ప్రపంచంలోనే 50 సంవత్సరాలుగా హీరోగా కొనసాగుతున్న ఏకైక వ్యక్తి తానేనని ఆయన పేర్కొన్నారు. ఇది ఆయన సినీ జీవితంలో ఒక అరుదైన మైలురాయిగా నిలిచింది. వరుస విజయాలపై దృష్టి సారించిన బాలయ్య, ‘అఖండ’, ‘వీర సింహా రెడ్డి’, ‘భగవంత్ కేసరి’, ‘డాకు మహారాజ్’ చిత్రాలతో వరుసగా నాలుగు హిట్లు సాధించానని తెలిపారు. ఈ విజయ పరంపరలో భాగంగా ఇప్పుడు విడుదల కానున్న ‘అఖండ 2: తాండవం’ కూడా బ్లాక్ బస్టర్ అవుతుందని ఆయన ధీమా వ్యక్తం చేశారు. రొటీన్ కథలతో కూడిన సినిమాలు తనకు నచ్చవని, వైవిధ్యభరితమైన కథాంశాలతోనే ముందుకు వెళ్తానని ఆయన స్పష్టం చేశారు. ఈ చిత్రంలో బాలయ్య రెండు పాత్రల్లో అలరించనున్నారు, దీనికి సంబంధించిన ప్రమోషనల్ కంటెంట్ ఇప్పటికే ప్రేక్షకుల నుంచి అద్భుతమైన స్పందన పొందింది.
Telugu News: Telangana Projects: PM మోదీకి CM రేవంత్ అందించిన వినతులివే
బ్లాక్ బస్టర్ ‘అఖండ’ చిత్రానికి సీక్వెల్గా బోయపాటి శ్రీను దర్శకత్వంలో రూపొందిన ఈ చిత్రం డిసెంబర్ 5న ప్రపంచ వ్యాప్తంగా థియేటర్లలో విడుదల కానుంది. 14 రీల్స్ ప్లస్ బ్యానర్ నిర్మించిన ఈ చిత్రంలో సంయుక్త మీనన్ హీరోయిన్గా నటించగా, ఆది పినిశెట్టి విలన్గా కనిపించనున్నారు. బాలయ్య, బోయపాటిల కాంబినేషన్ అంటే భారీ అంచనాలు ఉండటం సహజం. విడుదల తేదీకి ఒక రోజు ముందుగా, అంటే డిసెంబర్ 4 రాత్రి ప్రీమియర్ షోలు ప్రదర్శించనున్నారు. ఇప్పటికే ఆంధ్రప్రదేశ్లో టైటిల్ రేట్లు పెంచుకోడానికి ప్రభుత్వం అనుమతి ఇవ్వడంతో, అడ్వాన్స్ బుకింగ్స్ వేగంగా జరుగుతున్నాయి. ట్రేడ్ వర్గాల అంచనా ప్రకారం, ప్రీమియర్స్ అన్ని హౌస్ ఫుల్ అవ్వడంతో, ఈ చిత్రం బాలయ్య, బోయపాటిల కెరీర్లోనే హయ్యెస్ట్ ఓపెనింగ్స్ సాధించే అవకాశం ఉంది.
