ఛత్తీస్గఢ్ రాష్ట్రంలోని జైరామ్నగర్ రైల్వే స్టేషన్ సమీపంలో జరిగిన ఘోర రైలు ప్రమాదం దేశవ్యాప్తంగా కలకలం రేపింది. మంగళవారం ఉదయం కోర్బా–బిలాస్పూర్ ప్రయాణికుల రైలు, ఒక గూడ్స్ రైలును ఢీకొని దానిపైకి ఎక్కడం వల్ల ఈ విపరీత ఘటన చోటుచేసుకుంది. ప్రాథమిక సమాచారం ప్రకారం ఆరుగురు ప్రాణాలు కోల్పోగా, 25 మందికి పైగా ప్రయాణికులు తీవ్రంగా గాయపడ్డారు. ప్రమాదం జరిగిన వెంటనే స్థానిక ప్రజలు, రైల్వే సిబ్బంది, రెస్క్యూ బృందాలు ఘటనాస్థలానికి చేరి సహాయక చర్యలు ప్రారంభించాయి. బోగీల్లో ఇరుక్కున్న ప్రయాణికులను బయటకు తీయడానికి భారీ యంత్రాలను వినియోగించారు. రాత్రంతా కొనసాగిన శోధనలో ఇంకా మృతదేహాలు బయటకు వచ్చే అవకాశం ఉందని అధికార వర్గాలు తెలిపారు.
Latest News: Sigachi: సిగాచీ ప్రమాదంపై హైకోర్టు సీరియస్
ప్రమాదానికి అసలు కారణం ఏమిటనే దానిపై ఇప్పటివరకు స్పష్టత రాలేదు. దర్యాప్తు ప్రారంభించిన రైల్వే అధికారులు సిగ్నల్ లోపం లేదా మానవ తప్పిదం జరిగి ఉండొచ్చని అనుమానిస్తున్నారు. రెండు రైళ్లు ఒకే ట్రాక్పై ఎదురెదురుగా రావడం వల్ల ఢీకొట్టుకున్నాయని చెబుతున్నారు. గూడ్స్ రైలు రద్దీగా లోడ్ అయి ఉండగా, కోర్బా ప్యాసింజర్ రైలు వేగంగా వస్తూ ఢీకొట్టిన వెంటనే ఒక్క బోగి పూర్తిగా వెనుక భాగంపైకి ఎగిరిపోయిందని ప్రత్యక్ష సాక్షులు తెలిపారు. ప్రమాద సమయంలో రైలు వేగం అధికంగా ఉండడం వల్ల ఢీకొన్న దెబ్బకు బోగీలు సగం వరకు నలిగిపోయాయని, లోపల ఉన్న వారిని రక్షించడంలో సిబ్బంది తీవ్రంగా శ్రమిస్తున్నారని తెలిపింది రైల్వే శాఖ.
ప్రమాదం కారణంగా ఈ మార్గంలో రైలు రాకపోకలు పూర్తిగా స్తంభించాయి. రైల్వే అధికారులు సురక్షిత మార్గాల ద్వారా కొన్ని రైళ్లను మళ్లించగా, పలు రైళ్లు తాత్కాలికంగా రద్దు చేశారు. గాయపడిన వారిని సమీప ఆసుపత్రులకు తరలించి చికిత్స అందిస్తున్నారు. రాష్ట్ర ప్రభుత్వం బాధిత కుటుంబాలకు ఆర్థిక సాయం ప్రకటించనున్నట్లు సమాచారం. కేంద్ర రైల్వే మంత్రిత్వశాఖ కూడా ఘటనను సీరియస్గా తీసుకొని, దర్యాప్తు వేగవంతం చేయాలని ఆదేశించింది. ఈ ప్రమాదం మళ్లీ దేశవ్యాప్తంగా రైల్వే భద్రతా ప్రమాణాలపై ప్రశ్నలను లేవనెత్తింది. సాంకేతిక లోపాలు, సిగ్నల్ వ్యవస్థలో నిర్లక్ష్యం, మానవ తప్పిదాల వంటి అంశాలపై నిపుణులు కూడా ఆవేదన వ్యక్తం చేస్తున్నారు. జైరామ్నగర్ రైల్వే ప్రమాదం గత కొన్ని నెలల్లో ఛత్తీస్గఢ్లో నమోదైన మూడవ పెద్ద రైలు ప్రమాదంగా రికార్డవుతోంది.
Read hindi news: https://hindi.vaartha.com
Epaper : https://epaper.vaartha.com/
