మొంథా తుపాన్ ప్రభావంతో ఆంధ్రప్రదేశ్లో పలు నదులు ఉద్ధృతంగా ప్రవహిస్తున్నాయి. ముఖ్యంగా పెన్నా నదికి భారీగా వరదనీరు చేరడంతో సంగం బ్యారేజీ వద్ద పరిస్థితి ఉత్కంఠగా మారింది. ఈ వరద సమయంలోనే 30 టన్నుల బరువున్న ఇసుక బోటు లంగరు తెగిపోవడంతో అది ప్రవాహంలో కొట్టుకుపోయి నేరుగా బ్యారేజీ గేట్ల వైపు దూసుకెళ్లింది. బోటు వేగం, నీటి ఒత్తిడి చూస్తే క్షణాల్లోనే బ్యారేజీ గేట్లను ఢీకొట్టే అవకాశం కనిపించింది. ఇది జరిగి ఉంటే, బ్యారేజీ గేట్లకు తీవ్ర నష్టం వాటిల్లి ఉండేది. సమాచారం అందుకున్న వెంటనే నెల్లూరు కలెక్టర్ హిమాన్షు శుక్లా, ఎస్పీ, ఇరిగేషన్ అధికారులు అత్యవసర చర్యలు ప్రారంభించారు. డ్రోన్ల సాయంతో బోటు స్థానం గుర్తించి, ఎన్డీఆర్ఎఫ్, ఎస్డీఆర్ఎఫ్ బృందాలను సంఘటనా స్థలానికి తరలించారు.
Latest News: Modi: బీహార్లో మోదీ ఘాటు విమర్శలు
ఈ రెస్క్యూ ఆపరేషన్ నిజంగా ఒక హాలీవుడ్ యాక్షన్ సీన్ను తలపించేలా సాగింది. వరద నీటిలో గాలులు తీవ్రంగా వీచుతున్నప్పటికీ, బృందాలు అప్రమత్తంగా, సమన్వయంతో పని చేశాయి. సుమారు 30 మంది ఎన్డీఆర్ఎఫ్, 30 మంది ఎస్డీఆర్ఎఫ్, 100 మంది పోలీసు మరియు భద్రతా సిబ్బంది, కృష్ణపట్నం పోర్టు టీమ్, ఫైర్, ఇరిగేషన్ శాఖల సిబ్బంది కలిపి దాదాపు 200 మందికి పైగా ఈ ఆపరేషన్లో పాల్గొన్నారు. వారు పెన్నా నది ఉద్ధృతిని ఎదుర్కొంటూ, బోటును తాడ్ల సాయంతో బ్యారేజీకి ఎలాంటి నష్టం కలగకుండా ఒడ్డుకు సురక్షితంగా తీసుకువచ్చారు. కొన్ని గంటలపాటు సాగిన ఈ ఆపరేషన్ చివరకు విజయవంతమైంది.
ఈ సందర్భంలో రాష్ట్ర మంత్రివర్గ సభ్యుడు నారా లోకేష్ సోషల్ మీడియా (X) వేదికగా స్పందించారు. “టీమ్ వర్క్తో అతిపెద్ద జలగండాన్ని తప్పించిన మీ కృషికి హ్యాట్సాఫ్” అంటూ ఆయన బృందాలను ప్రశంసించారు. అలాగే కలెక్టర్, ఎస్పీ, ఎన్డీఆర్ఎఫ్, ఎస్డీఆర్ఎఫ్ సిబ్బందిని అభినందించారు. ఆయన పేర్కొన్నట్లుగా, ఆ బోటు బ్యారేజీ గేట్లను ఢీకొంటే కోట్ల రూపాయల నష్టం వాటిల్లే అవకాశం ఉండేది. కానీ అధికారుల వేగవంతమైన చర్యలతో ఒక భారీ విపత్తు తప్పింది. మొంథా తుపాన్ దెబ్బతో ఏర్పడిన ఈ ఆపత్కాల పరిస్థితిని చాకచక్యంగా ఎదుర్కొన్న ఈ బృందం, విపత్తు నిర్వహణలో ఆంధ్రప్రదేశ్ సామర్థ్యాన్ని మరోసారి నిరూపించింది.
Read hindi news: https://hindi.vaartha.com
Epaper : https://epaper.vaartha.com/
