‘చెక్ మేట్’ కథ
థ్రిల్లర్ జోనర్లో తెరకెక్కిన మలయాళ సినిమా చెక్ మేట్(Checkmate)లో అనూప్ మేనన్, రేఖ హరింద్రన్, లాల్ ముఖ్య పాత్రల్లో నటించారు. గత ఏడాది ఆగస్టు 8న థియేటర్లలో విడుదలైన ఈ చిత్రం, కొన్ని కారణాల వలన చాలా ఆలస్యంగా ఓటీటీలోకి వచ్చింది. ప్రస్తుతం తెలుగు, తమిళం, కన్నడ, హిందీతో పాటు మలయాళంలో కూడా స్ట్రీమింగ్ అవుతోంది.కథలో ఫిలిప్ కురియన్ (అనూప్ మేనన్) ఓ ఫార్మా కంపెనీ యజమాని. లాభాల కోసం నైతిక విలువలను పక్కన పెట్టి, నేరాలకు కూడా వెనుకాడడు. తనకు వ్యతిరేకంగా మాట్లాడే వారిని చెస్ ఆటలో మాదిరిగా “చెక్”(check) పెడుతూ అణచేస్తాడు. అతని కంపెనీ డ్రగ్ ట్రయల్స్ వల్ల ప్రజలు అనారోగ్యానికి గురై ప్రాణాలు కోల్పోయినా, అతను తన డబ్బు, ప్రభావంతో అన్ని విషయాలను దాచిపెడుతుంటాడు.
ఇలాంటి సమయంలో అంజలి అనే నిజాయితీగల యువతి అతనికి తలనొప్పిగా మారుతుంది. ఫిలిప్ తన సెక్రటరీ ఎన్నాతో ప్రేమలో ఉండగా, కొత్తగా వచ్చిన జెస్సీ (రేఖ హరింద్రన్) అతని జీవితంలోకి అడుగుపెడుతుంది. జెస్సీ ఆకర్షణలో ఫిలిప్ పూర్తిగా చిక్కుకుంటాడు. ఆమె గతంలో మోసం చేసిన వినయ్ (విశ్వం నాయర్) కూడా ప్రతీకారం తీర్చుకునేందుకు వస్తాడు. ఈ నలుగురి జీవితాలు ఎలాంటి మలుపులు తిరుగుతాయన్నదే కథ యొక్క మూలం.
Read Also: Crime: ఆయాల మధ్య గొడవ.. రెండు నెలల పసికందు మృతి
విశ్లేషణ
ఫార్మా మాఫియా, క్లినికల్ ట్రయల్స్ వంటి సామాజిక అంశాలతో ప్రారంభమైన ఈ సినిమా, మొదట్లో ఆసక్తికరంగా అనిపించినా త్వరగానే దిశ తప్పుతుంది. కథ నేరం, వ్యాపారం లైన్లను వదిలేసి, అక్రమ సంబంధాలు, మోసాల వైపు మళ్లిపోతుంది. దాంతో ప్రధాన థీమ్ పూర్తిగా మసకబారిపోతుంది.దర్శకుడు చెప్పదలచుకున్న అంశం స్పష్టంగా కనిపించదు. ఎక్కడా ఉత్కంఠ లేకుండా కథ నెమ్మదిగా సాగిపోతుంది. ప్రేక్షకుల ఆసక్తిని పెంచే ట్విస్టులు లేకపోవడం వల్ల కథ నిస్సత్తువగా మారింది. “చెక్ మేట్” అనే టైటిల్ పెట్టినప్పటికీ, వ్యూహాలు లేదా మైండ్ గేమ్స్ ఏవీ కనిపించవు. నటీనటుల పరంగా చెప్పాలంటే, ఎవరూ ప్రత్యేకంగా మెప్పించలేకపోయారు. టెక్నికల్గా కెమెరా వర్క్, నేపథ్య సంగీతం, ఎడిటింగ్ సాదారణ స్థాయిలోనే ఉన్నాయి.
ముగింపు
మొత్తం మీద చెక్ మేట్(Checkmate) ఒక థ్రిల్లర్గా మొదలై, ఎక్కడో కథను కోల్పోయిన సినిమా. ప్రారంభంలో ఉన్న డ్రగ్ మాఫియా థీమ్కి బదులుగా రొటీన్ వ్యక్తిగత సంబంధాలపై ఎక్కువ దృష్టి పెట్టడం వల్ల సినిమా బలహీనంగా మారింది. బలమైన కథా సరళి లేకపోవడం, నెమ్మదైన నేరేషన్ ఈ చిత్రాన్ని ప్రేక్షకుల సహనానికి పరీక్షగా మార్చాయి.
Epaper: https://epaper.vaartha.com/
Read also:
