ఆసియా కప్ ఫైనల్లో అద్భుతంగా రాణించిన మన తెలుగు కుర్రాడు తిలక్ వర్మ (Tilak Varma) ఇప్పుడు సోషల్ మీడియాలో కొత్త సర్ప్రైజ్తో అభిమానులను ఆకట్టుకుంటున్నాడు. ఫైనల్ మ్యాచ్లో తాను ధరించిన క్యాప్ను ఆంధ్రప్రదేశ్ ఐటీ మంత్రి నారా లోకేష్ (Nara Lokesh) కు ప్రత్యేక బహుమతిగా ఇస్తానని ప్రకటించాడు. తన సోషల్ మీడియా వేదికలో పోస్ట్ చేసిన వీడియో ప్రస్తుతం తెగ వైరల్ అవుతోంది.తిలక్ వర్మ వీడియోలో తన క్యాప్పై సంతకం చేసి, అందులో మంత్రి నారా లోకేష్ పేరును కూడా రాసాడు. ఆ క్యాప్ను ప్రేమతో లోకేష్ అన్నకు ఇస్తున్నానని స్పష్టంగా పేర్కొన్నాడు. తన విజయంలో ఒక భాగాన్ని లోకేష్తో పంచుకోవడం ఎంతో ఆనందంగా ఉందని చెప్పాడు.
లోకేష్ స్పందన
ఈ పోస్ట్ను చూసిన మంత్రి నారా లోకేష్ వెంటనే స్పందించారు. తమ్ముడు తిలక్ వర్మ బహుమతి తనకు ఎంతో ప్రత్యేకమైందని పేర్కొన్నారు. భారత్కు తిరిగి వచ్చిన తర్వాత స్వయంగా తిలక్ చేతుల మీదుగా క్యాప్ తీసుకుంటానని అన్నారు. అంతేకాదు, తిలక్ వర్మ సంతకం చేసిన క్యాప్ వీడియోను తన సోషల్ మీడియా ఖాతాల్లో షేర్ చేశారు.దుబాయ్ ఇంటర్నేషనల్ స్టేడియంలో జరిగిన ఆసియా కప్ ఫైనల్లో తిలక్ వర్మ ఆల్రౌండ్ షో కనబరిచాడు. 147 పరుగుల లక్ష్యాన్ని చేధించేందుకు బరిలోకి దిగిన టీమ్ ఇండియా 5 వికెట్ల తేడాతో పాకిస్థాన్ను చిత్తు చేసింది. దీంతో భారత్ తొమ్మిదోసారి ఆసియా కప్ టైటిల్ను కైవసం చేసుకుంది.
కీలక ఇన్నింగ్స్తో హైలైట్
ఈ విజయంలో తిలక్ వర్మ కీలకపాత్ర పోషించాడు. 53 బంతుల్లో 4 ఫోర్లు, 2 సిక్సులతో 69 పరుగులు సాధించాడు. అతని బ్యాటింగ్ జట్టు విజయానికి బలమైన పునాది వేసింది. ఈ ఇన్నింగ్స్తో తిలక్ వర్మ మరోసారి తన ప్రతిభను నిరూపించుకున్నాడు.
సోషల్ మీడియాలో వైరల్
తిలక్ వర్మ గిఫ్ట్ వీడియో సోషల్ మీడియాలో చక్కర్లు కొడుతోంది. అభిమానులు తిలక్ వినయాన్ని, లోకేష్పై చూపించిన గౌరవాన్ని ప్రశంసిస్తున్నారు. ఒకవైపు విజయాన్ని అందుకున్నా, మరోవైపు పెద్దలను గుర్తుంచుకోవడం అతని మంచి మనసును చూపుతుందని అభిమానులు అంటున్నారు.తిలక్ వర్మ గిఫ్ట్తో లోకేష్ ఆనందం వ్యక్తం చేయడం, అభిమానుల హర్షం వ్యక్తం చేయడం కలిపి ఈ సంఘటనను మరింత ప్రత్యేకంగా మార్చాయి. ఆసియా కప్లో అద్భుతమైన ఇన్నింగ్స్ ఆడి జట్టు విజయానికి తోడ్పడిన తిలక్ ఇప్పుడు అభిమానుల హృదయాలను గెలుచుకుంటున్నాడు.
Read Also :
