ఢిల్లీ ఎర్రకోటలో జైన ఉత్సవాల్లో భారీ చోరీ
దేశ రాజధాని ఢిల్లీలోని చారిత్రక ఎర్రకోట ప్రాంగణంలో జరిగిన జైన మతపరమైన పవిత్ర ఉత్సవాల్లో భారీ చోరీ చోటుచేసుకుంది. సుమారు రూ.1.5 కోట్ల విలువైన బంగారు కలశాలు, ఇతర విలువైన ఆభరణాలను దొంగతనం చేసిన నిందితుడిని పోలీసులు పట్టుకున్నారు. ఈ సంఘటన జైన భక్తులలో ఆందోళన రేపింది. ఆగస్టు 28 నుండి ఎర్రకోటలోని ఆగస్టు 15 పార్కులో జైనుల అత్యంత పవిత్రమైన “దశలక్షణ మహాపర్వ” ప్రారంభమైంది. ఈ మహా పర్వదినాల్లో ప్రతి రోజు ప్రత్యేక పూజలు, ఆరాధనలు జరుగుతున్నాయి. సెప్టెంబర్ 3న జరిగిన పూజా కార్యక్రమాలకు పెద్ద సంఖ్యలో భక్తులు హాజరయ్యారు. ఈ భక్తుల రద్దీని ఆసరాగా తీసుకున్న భూషణ్ వర్మ (Bhushan Verma) అనే వ్యక్తి భక్తుడి వేషంలో, పంచెకట్టు ధరించి కార్యక్రమంలోకి ప్రవేశించాడు. పూజల కోసం ప్రత్యేకంగా ఉంచిన విలువైన బంగారు వస్తువులను అతడు క్రమంగా అపహరించాడు.
జైన వ్యాపారవేత్త సుధీర్ జైన్ ప్రత్యేక పూజల కోసం తీసుకువచ్చేవారు
నిందితుడు మొత్తం 760 గ్రాముల బరువున్న బంగారు “ఝరీ” (కలశం), బంగారు కొబ్బరికాయ, వజ్రాలు, కెంపులు, పచ్చలతో పొదిగిన 115 గ్రాముల బంగారు కలశం వంటి అత్యంత విలువైన ఆభరణాలను దొంగిలించాడు. ఈ వస్తువులు జైన సంప్రదాయంలో ఎంతో పవిత్రమైనవి. వీటిని ప్రతి రోజు జైన వ్యాపారవేత్త సుధీర్ జైన్ ప్రత్యేక పూజల కోసం తీసుకువచ్చేవారు.
సీసీటీవీ ఫుటేజీని విశ్లేషించిన పోలీసులు చాకచక్యంగా కేసును ఛేదించారు. నిందితుడు భూషణ్ వర్మను ఉత్తరప్రదేశ్ రాష్ట్రంలోని హాపూర్లో అరెస్టు చేశారు. పోలీసులు తెలిపిన వివరాల ప్రకారం, అతను జైన మతస్థుడు కాదని, ఇంతకుముందు కూడా పలు కేసుల్లో నిందితుడిగా ఉన్నాడని తెలిసింది. అతడి గత చరిత్రను పరిశీలిస్తున్నామని, ప్రస్తుతం అతడి వద్దనుంచి దొంగిలించిన వస్తువులను తిరిగి స్వాధీనం చేసుకునేందుకు ప్రయత్నాలు కొనసాగుతున్నాయని పోలీసులు తెలిపారు.
చోరీకి గురైన ఈ ఆభరణాలు
చోరీకి గురైన ఈ ఆభరణాలు వ్యాపారవేత్త సుధీర్ జైన్ (Sudhir Jain) వ్యక్తిగత ఆస్తి. ప్రతిరోజూ ఆయన వాటిని మహా పర్వ పూజల కోసం తీసుకువచ్చి, భక్తులతో కలిసి ఆరాధనలు నిర్వహించేవారు. ఈ ఘటనపై ఆయన తీవ్ర ఆవేదన వ్యక్తం చేశారు. “ఈ వస్తువులకు ఉన్న భౌతిక విలువ కంటే, వాటితో మాకు ఉన్న భావోద్వేగ బంధం ఎంతో గొప్పది. వాటిని కోల్పోవడం మాకు పెద్ద నష్టంగా అనిపిస్తోంది,” అని సుధీర్ జైన్ (Sudhir Jain) చెప్పారు.
జైన సమాజంలో ఈ ఘటన కలకలం రేపింది. భక్తుల పట్ల భక్తుడి వేషంలో దొంగతనం చేయడం జైనుల మతపరమైన భావోద్వేగాలకు గాయపరిచిందని పలువురు పేర్కొన్నారు. అయితే పోలీసులు వేగంగా స్పందించి నిందితుడిని పట్టుకోవడం కొంత భరోసా కలిగించింది. ప్రస్తుతం ఈ కేసుపై దర్యాప్తు కొనసాగుతోంది. పోలీసులు స్వాధీనం చేసుకున్న సీసీటీవీ ఫుటేజీ ఆధారంగా మరిన్ని వివరాలు బయటకు రానున్నాయి. దొంగిలించిన వస్తువులను తిరిగి జైన వ్యాపారవేత్తకు అందించే దిశగా చర్యలు తీసుకుంటున్నట్లు పోలీసులు వెల్లడించారు.
Read hindi news: hindi.vaartha.com
Read also:
