స్వాతంత్ర్య దినోత్సవం సందర్భంగా ప్రధాని మోదీ (Prime Minister Modi) చేసిన డబుల్ దీపావళి హామీ ఇప్పుడు కార్యరూపం దాల్చనుంది. కేంద్ర ప్రభుత్వం దేశ పన్నుల వ్యవస్థలో భారీ మార్పులకు సిద్ధమవుతోంది. పన్నుల భారం తగ్గించేందుకు, వినియోగాన్ని పెంచేందుకు, ఒక చక్కటి పథకాన్ని అమలు చేయబోతోందని విశ్వసనీయ సమాచారం.ప్రస్తుతం జీఎస్టీ (GST)లో 5%, 12%, 18%, 28% వంటి పన్ను శ్లాబులు ఉన్నాయి. కానీ కొత్త ప్రతిపాదన ప్రకారం, కేవలం 5% మరియు 18% మాత్రమే ఉండేలా మార్పులు చేయనున్నారు. ఇది వినియోగదారులకు నేరుగా లాభాన్ని అందించనుంది.
12 శాతం వస్తువులపై తక్కువ పన్ను
ఇప్పుడు 12 శాతం శ్లాబులో ఉన్న 99% వస్తువులను 5% పన్ను శ్లాబులోకి తేర్చనున్నారు. దీని వల్ల నిత్యావసర వస్తువుల ధరలు తగ్గే అవకాశం ఉంది. ఇది ప్రధానంగా మధ్య తరగతికి పెద్ద ఊరట.ఈ మార్పులో 28 శాతం పన్ను ఉన్న 90% వస్తువులు ఇకపై 18 శాతం పన్నుతో అందుబాటులోకి రానున్నాయి. దీని వల్ల ఏసీ, ఫ్రిజ్, వాషింగ్ మెషీన్ వంటి గృహోపకరణాల ధరలు గణనీయంగా తగ్గే సూచనలు కనిపిస్తున్నాయి.పొగాకు, గుట్కా, సిగరెట్లు వంటి ఆరోగ్యానికి హానికరమైన వస్తువులపై 40 శాతం ప్రత్యేక పన్ను విధించాలని ప్రతిపాదించారు. ఇది కేవలం 5 నుంచి 7 వస్తువుల వరకే పరిమితం కానుంది. మిగతా విలువైన వస్తువులపై ప్రస్తుతం ఉన్న పన్ను రేట్లు కొనసాగుతాయి.ఇప్పటికీ పెట్రోలియం ఉత్పత్తులు జీఎస్టీ పరిధిలోకి రావు. వజ్రాలు, విలువైన రాళ్లపై ప్రస్తుతం ఉన్న పన్నే కొనసాగనుంది. దీనిపై ఎలాంటి మార్పులూ ప్రస్తావించలేదు.
ఎందుకు ఈ మార్పులు?
కేంద్ర ఆర్థిక శాఖ గణాంకాల ప్రకారం, జీఎస్టీ ఆదాయంలో 67% వంతు 18% శ్లాబు నుంచే వస్తోంది. ప్రభుత్వం ఇప్పుడు వినియోగాన్ని ప్రోత్సహించేందుకు, ప్రజల ఖర్చులకు ఊతమివ్వాలనే ఉద్దేశంతో పన్ను శ్లాబులను సరళతరం చేయాలని చూస్తోంది.అధికారుల అంచనా ప్రకారం, పన్ను తగ్గినా, వినియోగం పెరిగితే ఆదాయానికి నష్టం ఉండదు. దీని వల్ల మార్కెట్లో చైతన్యం పెరుగుతుందని విశ్లేషణలు చెబుతున్నాయి.
నేరుగా లాభపడే వర్గాలు
ఈ ప్రతిపాదనలు అమలవితే మధ్యతరగతి, రైతులు, మహిళలు, అలాగే చిన్న వ్యాపారులకు పెద్ద ఉపశమనం లభించనుంది. నిత్యావసరాల ధరలు తగ్గితే జీవన విధానం కొంత హాయిగా మారుతుంది.ఈ ప్రతిపాదనపై తుది నిర్ణయం జీఎస్టీ మండలి సెప్టెంబర్ లేదా అక్టోబర్లో తీసుకోనుంది. రాష్ట్రాల ఆర్థిక మంత్రులు సభ్యులుగా ఉన్న ఈ మండలి ఆమోదించిన తరువాతే కొత్త శ్లాబులు అమల్లోకి వస్తాయి.ప్రభుత్వం ప్రతిపాదిస్తున్న ఈ జీఎస్టీ మార్పులు అమలవుతాయంటే, అది నిజంగా దేశవ్యాప్తంగా ఉన్న మధ్యతరగతికి ఒక చిన్న దీపావళి కానుకలా మారుతుంది. మోదీ హామీగా ఇచ్చిన “డబుల్ దీపావళి” వాస్తవంగా మారే దిశగా అడుగులు పడుతున్నాయి.
Read Also :
