ఆంధ్రప్రదేశ్ మాజీ ముఖ్యమంత్రి వైఎస్ జగన్మోహన్ రెడ్డి (Jagan) అనంతపురంలో పర్యటించిన సమయంలో ఒక అనూహ్య ఘటన చోటుచేసుకుంది. వైఎస్సార్సీపీ నేత వై విశ్వేశ్వర్ రెడ్డి కుమారుడి వివాహ వేడుకకు హాజరైన జగన్కు షేక్ హ్యాండ్ ఇచ్చేందుకు ఒక అభిమాని ప్రయత్నించాడు. ఈ క్రమంలో జగన్ భద్రతా సిబ్బంది ఆ అభిమానిపై దాడి చేశారు. ఈ సంఘటన వివాహ వేదిక వద్ద కలకలం సృష్టించింది.
షేక్ హ్యాండ్ ఇచ్చే ప్రయత్నంలో తోపులాట
జగన్ వద్దకు వెళ్లాలని ప్రయత్నించిన అభిమాని రోప్ను దాటి ముందుకు వెళ్లాడు. షేక్ హ్యాండ్ ఇచ్చే ప్రయత్నంలో అతని గోర్లు జగన్ చేతికి గీసుకుపోయాయి. దీంతో అప్రమత్తమైన గన్మెన్, ఆ అభిమానిపై పిడిగుద్దులు కురిపించాడు. ఈ తోపులాటలో ఒక మహిళకు కూడా స్వల్ప గాయాలైనట్లు సమాచారం. గన్మెన్ దాడిపై సోషల్ మీడియాలో తీవ్ర విమర్శలు వ్యక్తమవుతున్నాయి.
రాజకీయ వర్గాల్లో చర్చ
ఈ ఘటన రాజకీయ వర్గాల్లో చర్చకు దారితీసింది. అభిమానిపై గన్మెన్ ప్రవర్తించిన తీరుపై పలువురు ఆక్షేపణ వ్యక్తం చేస్తున్నారు. మాజీ ముఖ్యమంత్రి భద్రతకు ప్రాధాన్యత ఉన్నప్పటికీ, అభిమానులతో మర్యాదగా వ్యవహరించాలని, ఇలాంటి దాడులు సరికాదని పలువురు అభిప్రాయపడుతున్నారు. ఈ ఘటనపై వైఎస్సార్సీపీ నేతలు గానీ, భద్రతా సిబ్బంది గానీ ఇంకా అధికారికంగా స్పందించలేదు.
