Badmashulu Movie: బద్మాషులు (ఈటీవీ విన్) మూవీ రివ్యూ

ఓటీటీ వేదికలపై గ్రామీణ నేపథ్యంలోని కథలకు ఇటీవల మంచి ఆదరణ లభిస్తోంది. ‘బలగం’ వంటి సినిమాలు గ్రామీణ జీవన శైలిని, ఆ ప్రాంతపు భావోద్వేగాలను నిజ జీవితానికి దగ్గరగా చూపించడం ద్వారా ప్రేక్షకుల మనసులను గెలుచుకున్నాయి. ఈ తరహా విజయాలు నిర్మాతలకు, దర్శకులకు నూతన ఆత్మవిశ్వాసాన్ని ఇచ్చాయి. అదే తరహాలో తెరకెక్కిన మరో సినిమా ‘బద్మాషులు’ (Badmashulu).శంకర్ చేగూరి దర్శకత్వం వహించిన ఈ చిత్రం, జూన్ 6న థియేటర్లలో విడుదలై, మంచి టాక్ ను తెచ్చుకుంది. ప్రేక్షకులు థియేటర్లలోనే కాకుండా ఓటీటీలో కూడా వీక్షించేందుకు ఆసక్తి చూపారు.ఈ నెల 8వ తేదీ నుంచి ‘ఈటీవీ విన్’లో స్ట్రీమింగ్ అవుతోంది.

కథ సారాంశం

కోతుల గూడెం’ గ్రామంలో తిరుపతి (మహేశ్ చింతల), ముత్యాలు (విద్యాసాగర్) అనే ఇద్దరు స్నేహితులు ఉంటారు. తిరుపతి ఇంటి దగ్గరే టైలరింగ్ చేస్తూ ఉంటాడు. అతనికి మహా బద్ధకం .. తాగడం కోసమే పనిచేస్తూ ఉంటాడు. ఎప్పటికప్పుడు మాయమాటలు చెబుతూ, తెలివిగా గండాల నుంచి బయటపడుతూ ఉంటాడు. అవసరమైతే, ఒకరు ఇచ్చిన బట్టలను మరొకరికి ఇచ్చేస్తూ ఉంటాడు. భార్య ఎంతగా చెప్పినా అతను వినిపించుకోడు.ఇక ‘ముత్యాలు’ విషయానికి వస్తే అతను బార్బర్ గా పనిచేస్తూ ఉంటాడు. అతనికి సెలూన్ షాప్ (Salon Shop) ఉంటుంది కానీ, అందులో అతను కుదురుగా కూర్చోడు. ఊళ్లో తిరుగుతూ ఎక్కడపడితే అక్కడ కటింగ్ చేసేస్తూ ఉంటాడు. డబ్బులు చేతిలో పడితేనే తప్ప అతను కత్తెర పట్టుకోడు. సంపాదన సంగతి అలా ఉంచితే, భార్య టార్చర్ ను భరించలేకపోతుంటాడు. అందుకు కారణం ఎదురింటి లత .. ఆమెను గతంలో అతను లవ్ చేశాడనే విషయం భార్యకి తెలియడం.

విశ్లేషణ

ఇద్దరు స్నేహితులు కూడా తాగుడికి బానిసలు. పనిచేయడానికి బద్ధకిస్తూ ఉండటం వలన సంపాదన అంతంత మాత్రం. వాళ్ల గురించి తెలిసినవారెవరూ అప్పు ఇవ్వరు. దాంతో ఇద్దరూ కలిసి దొంగతనానికి పాల్పడతారు. ఆ డబ్బుతో ఎంజాయ్ చేస్తూ ఉంటారు. వాళ్ల దగ్గర డబ్బులు ఎక్కడివనేది ఎవరికీ అర్థం కాదు. అప్పుడు వాళ్లకి ఒక అనూహ్యమైన సంఘటన ఎదురవుతుంది. అదేమిటి? పర్యవసానాలు ఎలాంటివి? అనేది కథ. తెలంగాణ గ్రామీణ ప్రాంతంలో ‘బద్మాష్’ అనే తిట్టు ఎక్కువగా వినిపిస్తూ ఉంటుంది. వాడు పెద్ద ముదురు అనే మాటకు బదులుగా, వాడు పెద్ద ‘బద్మాష్’ గాడు అని చెప్పుకుంటూ ఉంటారు. అలాంటి ఇద్దరి స్నేహితుల కథ కావడం వలన, ‘బద్మాషులు’ అనే టైటిల్ ను సెట్ చేశారు. ఈ టైటిల్ కి తగినట్టుగా ఈ కథ నడిచిందా అంటే, నడిచిందనే చెప్పాలి.