తెలుగు దేశం పార్టీ నేతృత్వంలోని కొత్త కూటమి ప్రభుత్వం ఎన్నికల సమయంలో ప్రకటించిన ‘సూపర్ సిక్స్’ (Super Six) హామీల అమలు దిశగా వేగంగా అడుగులు వేస్తోంది. ఇందులో భాగంగా మహిళలకు ఉచిత బస్సు ప్రయాణ పథకాన్ని రాబోయే ఆగస్టు 15న ప్రారంభించనున్నట్లు ప్రభుత్వం అధికారికంగా ప్రకటించింది. ముఖ్యమంత్రి చంద్రబాబు నాయుడు స్వయంగా ఈ విషయాన్ని ఖరారు చేయగా, తాజాగా మంత్రి అచ్చెన్నాయుడు మరింత స్పష్టతనిచ్చారు.
ఇతర రాష్ట్రాల మోడళ్లపై అధ్యయనం
ఈ పథకాన్ని అమలు చేయడానికి అధికారులు, మంత్రులు ఇప్పటికే తెలంగాణ, కర్ణాటక, ఢిల్లీ వంటి రాష్ట్రాల్లో ప్రయాణించి అక్కడ అమలవుతున్న ఉచిత బస్సు విధానాలను పరిశీలించారు. ఆయా రాష్ట్రాల్లోని విజయవంతమైన నమూనాలను అధ్యయనం చేసి, ఆ అనుభవాలను ఏపీకి అన్వయించేందుకు ప్రయత్నిస్తున్నారు.
ఐదు రకాల బస్సుల్లో ఉచిత ప్రయాణం
అన్నవరంలో జరిగిన “సుపరిపాలనలో తొలి అడుగు” కార్యక్రమంలో పాల్గొన్న మంత్రి అచ్చెన్నాయుడు (Atchannaidu) మాట్లాడుతూ, రాష్ట్రంలోని మహిళలు ఐదు రకాల బస్సుల్లో ఉచితంగా ప్రయాణించే అవకాశం కల్పించబడుతుందని తెలిపారు. ఇది జిల్లాలకే పరిమితమవదని, రాష్ట్రవ్యాప్తంగా ఈ పథకం వర్తించనుందని స్పష్టం చేశారు.
మహిళలకు ప్రయోజనం – పథకం ఉద్దేశ్యం
ఈ పథకం ప్రధానంగా గ్రామీణ, పట్టణ ప్రాంతాల్లో పనిచేసే మహిళలకు ప్రయాణ ఖర్చును తగ్గించడంతోపాటు, ఆర్థికంగా స్వావలంబన దిశగా అడుగులు వేయడానికి సహాయపడుతుంది. విద్యార్థినులు, ఉద్యోగినులు, వ్యాపార కార్యకలాపాల్లో పాల్గొనే మహిళలు దీనివల్ల ఎంతో లబ్ధి పొందనున్నారని అధికారులు భావిస్తున్నారు.
ఆటో డ్రైవర్లకు ఆర్థిక సాయం
ఈ కార్యక్రమంలో మంత్రి అచ్చెన్నాయుడు మరో ముఖ్యమైన అంశాన్ని కూడా ప్రకటించారు. అదే రోజు అంటే ఆగస్టు 15న ఆటో డ్రైవర్లకు ఆర్థిక సహాయం కూడా అందించనున్నట్లు వెల్లడించారు. ఇది రవాణా రంగాన్ని బలోపేతం చేయడంలో భాగమని ఆయన తెలిపారు .
Read hindi news: hindi.vaartha.com
