హర్యానా గవర్నర్, ప్రముఖ రాజకీయవేత్త బండారు దత్తాత్రేయ (Bandaru Dattatreya) రచించిన ‘ప్రజల కథే నా ఆత్మకథ’ పుస్తకావిష్కరణ (Autobiography Book) కార్యక్రమం హైదరాబాద్లో ఎంతో ఘనంగా జరిగింది. ఈ కార్యక్రమానికి ముఖ్య అతిథిగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు హాజరై పుస్తకాన్ని ఆవిష్కరించారు. దత్తాత్రేయ తన ప్రజాజీవితంలో సాధించిన విజయాలు, ప్రజా సేవ పట్ల నిబద్ధత, నిరాడంబరత వంటి అంశాలను స్ఫుటంగా చాటిచెప్పే రచన ఇది అని చంద్రబాబు పేర్కొన్నారు. ఈ పుస్తకం భావి తరాల నాయకులకు మార్గదర్శకంగా నిలుస్తుందని ప్రశంసలు కురిపించారు.
ఈ సభలో మాజీ రాష్ట్రపతి రామ్ నాథ్ కోవింద్, మాజీ ఉపరాష్ట్రపతి వెంకయ్య నాయుడు, సుప్రీంకోర్టు మాజీ ప్రధాన న్యాయమూర్తి జస్టిస్ ఎన్వీ రమణ, ఏపీ గవర్నర్ అబ్దుల్ నజీర్, కేంద్రమంత్రి కిషన్ రెడ్డి, తెలంగాణ మంత్రులు కోమటిరెడ్డి వెంకట్ రెడ్డి, శ్రీధర్ బాబు, బీజేపీ ఎంపీ రఘునందన్ రావు తదితర ప్రముఖులు హాజరయ్యారు. వివిధ పార్టీలు, వేదికపై ఐక్యంగా కనిపించడం రాజకీయ సమన్వయానికి నిదర్శనంగా నిలిచింది. పుస్తకావిష్కరణ సందర్భంగా గౌరవంగా, ఉత్సాహంగా ఆత్మకథను చర్చించటం విశేషంగా మారింది.
“జనతా కీ కహానీ – మేరీ ఆత్మకథ”
బండారు దత్తాత్రేయ తన ఆత్మకథ గురించి మాట్లాడుతూ.. ఇది సామాన్య జీవితం నుంచి అత్యున్నత రాజ్యాంగ పదవుల వరకూ తన ప్రయాణానికి ప్రతిబింబమని తెలిపారు. తల్లిదండ్రుల నుంచి పొందిన సేవా తత్వం, ప్రజలతో మమేకం కావాలన్న భావనే తన జీవితాన్ని మలిచిందని గుర్తుచేసుకున్నారు. యువత ఈ పుస్తకం ద్వారా స్ఫూర్తి పొందాలని, ప్రజా సేవలో అంకితంగా ముందుకు సాగాలని ఆకాంక్షించారు. హిందీకి అనువదించిన “జనతా కీ కహానీ – మేరీ ఆత్మకథ” అనంతరం, ఇప్పుడు తెలుగు ప్రజల కోసం ఆత్మకథ విడుదల కావడం ఈ కార్యక్రమానికి ప్రత్యేకతను తీసుకువచ్చింది.
Read Also : YCP : భారీగా వైసీపీ నేతల సస్పెన్షన్
