టెక్నాలజీ రంగంలో ఉద్యోగ కోతలు తీవ్రమవుతూ, భవిష్యత్పై అనేక అనిశ్చితులను కలిగిస్తున్నాయి. ప్రస్తుత ఆర్థిక వాతావరణం, మార్కెట్లో మారుతున్న వ్యూహాలు, అంతకు మించి కృత్రిమ మేధ (AI) పెరుగుతున్న ప్రాముఖ్యత ఇవన్నీ కలసి టెక్ ఉద్యోగుల జీవన మార్గాన్ని అనేక విధాలుగా ప్రభావితం చేస్తున్నాయి. మైక్రోసాఫ్ట్, గూగుల్, అమెజాన్ వంటి దిగ్గజ సంస్థలు కూడా తాజాగా మరోసారి వందల సంఖ్యలో ఉద్యోగులను ఇళ్లకు పంపించాయి.
దిగ్గజ కంపెనీలు ఉద్యోగులను తగ్గిస్తున్న తీరుపై ఆందోళన
ఈ ఏడాది ప్రారంభం నుంచి ఇప్పటివరకు 130కి పైగా టెక్ కంపెనీలు కలిసి 61,000 మంది ఉద్యోగులను తొలగించాయని గణాంకాలు చెబుతున్నాయి. ఈ నెల 13న మైక్రోసాఫ్ట్ ఏకంగా 6,000 మంది ఉద్యోగులకు ఉద్వాసన పలికింది. మార్కెట్లో పోటీని తట్టుకుని నిలబడటానికీ, కంపెనీ పునర్వ్యవస్థీకరణ లక్ష్యాలను చేరుకోవడానికీ ఈ కోతలు తప్పడం లేదని మైక్రోసాఫ్ట్ యాజమాన్యం ఒక ప్రకటనలో తెలిపింది. గూగుల్ 200 మందిని, అమెజాన్ 100 మందిని, వాల్మార్ట్ 1500 మందిని ఉద్యోగ విరమణకు గురిచేసింది. ఇవి కేవలం ఒక నెలలోనే జరిగిన పరిణామాలు కావడం గమనార్హం. సంస్థాగత పునర్నిర్మాణంలో భాగంగానే ఈ నిర్ణయం తీసుకున్నట్లు గూగుల్ వెల్లడించింది. అమెజాన్ కూడా తమ కార్యకలాపాలను క్రమబద్ధీకరించేందుకు ఈ నెలలో వంద మంది ఉద్యోగులను తొలగించినట్లు పేర్కొంది.
కృత్రిమ మేధ ఆధిపత్యంతో కోడింగ్ ఉద్యోగాలకు ముప్పు
ముఖ్యంగా సాఫ్ట్వేర్ ఇంజినీర్లు, డేటా ఎనలిస్టులు, టెస్ట్ ఇంజినీర్లు వంటి ఉద్యోగాలు ఇక AI ఆధారిత టూల్స్ చేత భర్తీ అవుతున్నాయి. మైక్రోసాఫ్ట్ తొలగించిన ఉద్యోగుల్లో 40 శాతం మంది కోడింగ్ ఆధారిత ఉద్యోగులు ఉండటం, ఈ వాదనకు బలాన్ని ఇస్తోంది. AI టూల్స్తోనే ముందుగా వారికి శిక్షణ ఇచ్చి, ఆపై అదే టూల్స్ వల్ల ఉద్యోగాల కోత జరగడం పై వారు తీవ్ర ఆవేదన వ్యక్తం చేస్తున్నారు.
సత్య నాదెళ్ల వ్యాఖ్యలు & పరిశ్రమపై ప్రభావం
ఉద్యోగ బాధ్యతలను కృత్రిమ మేధే సమర్థంగా నిర్వర్తించడంతో యాజమాన్యం వారిని తొలగించింది. దీంతో, తమకు తెలియకుండానే తమ ఉద్యోగాలను భర్తీ చేసే ప్రత్యామ్నాయాలకు తామే శిక్షణ ఇచ్చామా అన్న ఆవేదన ఆ ఇంజినీర్లలో వ్యక్తమవుతోంది. ఇటీవల మైక్రోసాఫ్ట్ సీఈవో సత్య నాదెళ్ల మాట్లాడుతూ తమ సంస్థలో కోడింగ్ పనుల్లో మూడో వంతు కృత్రిమ మేధే పూర్తిచేస్తోందని వ్యాఖ్యానించిన విషయం తెలిసిందే. ఈ పరిణామాలు టెక్ రంగ నిపుణుల భవిష్యత్తుపై తీవ్ర ప్రభావం చూపుతున్నాయి.
Read also: Adani: చరిత్ర సృష్టించిన అదానీ గ్రూప్.. రికార్డ్ ఆదాయం !
