ఫైనల్ మ్యాచ్కి కోట్లకు పైగా వ్యూస్ ఇటీవల పాకిస్తాన్ యునైటెడ్ అరబ్ ఎమిరేట్స్ వేదికగా జరిగిన ఐసీసీ ఛాంపియన్స్ ట్రోఫీ విజయవంతంగా ముగిసింది. పుష్కరకాలం తర్వాత మరోసారి భారత జట్టు ఈ ప్రతిష్ఠాత్మక టైటిల్ను సొంతం చేసుకుంది. 2013లో ఎంఎస్ ధోనీ నాయకత్వంలో ట్రోఫీని గెలుచుకున్న టీమిండియా, ఈసారి రోహిత్ శర్మ సారథ్యంలో అద్భుత విజయాన్ని సాధించింది. దీంతో భారత్ మొత్తం మూడు సార్లు ఛాంపియన్స్ ట్రోఫీని గెలిచిన ఘనతను సాధించింది.ఈ మెగా టోర్నమెంట్లో ఫైనల్ మ్యాచ్కి ప్రేక్షకాదరణ తిరుగులేని రీతిలో పెరిగింది. జియో హాట్స్టార్లో ప్రసారమైన ఈ మ్యాచ్ రికార్డు స్థాయిలో వ్యూస్ సాధించింది. భారత్, న్యూజిలాండ్ మధ్య జరిగిన హోరాహోరీ ఫైనల్ 90 కోట్లకు పైగా వీక్షణలను అందుకున్నది.
అంతేకాదు మొత్తం ఛాంపియన్స్ ట్రోఫీ టోర్నమెంట్కు వచ్చిన వ్యూస్ సంఖ్య వింటే ఆశ్చర్యపోవడం ఖాయం.జాతీయ మీడియా నివేదికల ప్రకారం, ఈ మెగా ఈవెంట్కు 540.3 కోట్ల వ్యూస్ రాగా, 11,000 కోట్ల నిమిషాల పాటు వాచ్టైమ్ నమోదైంది. ఈ గణాంకం భారతదేశ (143 కోట్లు), చైనా (141 కోట్లు) జనాభా కంటే రెట్టింపు కావడం విశేషం. ఒకే సమయంలో 6.2 కోట్ల మంది ప్రేక్షకులు లైవ్లో మ్యాచ్ వీక్షించడం విశేషం.జియో హాట్స్టార్ డిజిటల్ సీఈఓ కిరణ్ మణి మాట్లాడుతూ, “ఐసీసీ ఛాంపియన్స్ ట్రోఫీకి అద్భుతమైన ప్రేక్షకాదరణ లభించింది. కోట్లాది మంది వీక్షించే అవకాశం లభించింది. భారత్-ఆస్ట్రేలియా మధ్య తొలి సెమీఫైనల్ మ్యాచ్ సందర్భంగా ఒక్క రోజులోనే అత్యధికంగా సబ్స్క్రిప్షన్లు వచ్చాయి” అని తెలిపారు. ముఖ్యంగా హిందీ మాట్లాడే రాష్ట్రాల నుంచి 38 శాతం వీక్షణలు వచ్చాయని పేర్కొన్నారు.
ఉత్తరప్రదేశ్, ఉత్తరాఖండ్, మహారాష్ట్ర, గోవా, పంజాబ్, హర్యానా వంటి రాష్ట్రాల నుంచి భారీగా వ్యూస్ వచ్చాయని వివరించారు.ఈ టోర్నమెంట్ ప్రేక్షకాదరణను పరిశీలిస్తే, డిజిటల్ మీడియా ఎలా విస్తరిస్తుందో స్పష్టంగా అర్థమవుతుంది. క్రికెట్ ప్రేమికుల సంఖ్య రోజురోజుకూ పెరుగుతుండటమే కాకుండా, ఆన్లైన్ స్ట్రీమింగ్ ప్లాట్ఫారమ్లపై వీక్షణలు విపరీతంగా పెరుగుతున్నాయి. టెక్నాలజీ అభివృద్ధి, ఇంటర్నెట్ అందుబాటులోకి రావడం వంటి అంశాలు ఈ విజయంలో కీలకపాత్ర పోషించాయి.ఇకపోతే ఛాంపియన్స్ ట్రోఫీ విజయం టీమిండియాకు మరోసారి గర్వకారణంగా నిలిచింది. రోహిత్ శర్మ కెప్టెన్సీలో గెలిచిన ఈ ట్రోఫీ భారత జట్టు క్రీడా ప్రస్థానంలో మరో మైలురాయి అని చెప్పొచ్చు. భారత క్రికెట్ అభిమానులు ఈ విజయాన్ని ఘనంగా జరుపుకుంటున్నారు. భవిష్యత్తులో కూడా భారత జట్టు ఇలాంటి ఘన విజయాలను సాధించాలని అభిమానులు ఆకాంక్షిస్తున్నారు.
