ప్రఖ్యాత గాయకుడు పి జయచంద్రన్ ఈరోజు తుదిశ్వాస విడిచారు. 80 సంవత్సరాల వయసులో ఓ ప్రైవేటు ఆస్పత్రిలో చికిత్స పొందుతూ ఆయన మరణించారు. ఈ విషయాన్ని ఆయన కుటుంబ సభ్యులు ధృవీకరించారు. సంగీత రంగంలో అరుదైన ప్రతిభతో జయచంద్రన్ అనేక తరాలకు ఆదర్శంగా నిలిచారు.
ఆరు దశాబ్దాల పాటు కొనసాగిన ఆయన సంగీత ప్రయాణం విశేషంగా నిలిచింది. మలయాళం, తమిళం, తెలుగు, కన్నడ, హిందీ భాషల్లో 16,000 పాటలకు పైగా ఆలపించిన ఘనత ఆయన సొంతం. తన గానానికి తగిన గుర్తింపుగా జాతీయ స్థాయిలో ఉత్తమ గాయకుడిగా పురస్కారం అందుకున్నారు. జయచంద్రన్ కేరళలోనే కాకుండా ఇతర రాష్ట్రాల్లో కూడా ప్రసిద్ధి పొందారు. ఆయన ఐదు సార్లు కేరళ రాష్ట్ర పురస్కారాలు, తమిళనాడు రాష్ట్రం నుంచి కలైమామణి అవార్డుతో పాటు నాలుగు ఇతర రాష్ట్ర ప్రభుత్వ పురస్కారాలు అందుకున్నారు. జయచంద్రన్ సంగీత శైలికి ప్రత్యేకత ఉంది. ఆయన పాడిన పాటలు సంగీత ప్రియులను ఎంతో మెప్పించాయి. భక్తి గీతాలు, ప్రేమ గీతాలు, విషాద గీతాలు అనే తేడా లేకుండా ఆయన స్వరం ప్రేక్షకులను మంత్ర ముగ్ధుల్ని చేసింది. పాటలలో ఆయన భావవ్యక్తీకరణ ప్రజల హృదయాలను తాకేలా ఉండేది. జయచంద్రన్ మృతి సంగీత రంగానికి తీరని లోటు. ఆయన సంగీత ప్రపంచానికి చేసిన సేవలు స్మరించుకునేలా ఉంటాయి. అతని పాటలు తరతరాలకు స్ఫూర్తిగా నిలుస్తాయని ప్రముఖులు పేర్కొంటున్నారు. సంగీత ప్రియులు, సినీ ప్రముఖులు, అభిమానులు ఆయన మరణం పట్ల సంతాపం వ్యక్తం చేస్తున్నారు.
