ఆరు వికెట్ల తేడాతో భారత్ను ఓడించి బోర్డర్-గవాస్కర్ ట్రోఫీని 3-1తో గెలుచుకున్న ఆస్ట్రేలియా జట్టు, ఇప్పుడు ప్రపంచ టెస్ట్ ఛాంపియన్షిప్ (WTC) ఫైనల్కు అర్హత సాధించేందుకు సిద్ధమైంది. అయితే, స్లో ఓవర్రేట్ కారణంగా పాయింట్ల కోత ఉంటుందా లేదా అనే అంశంపై అంతర్జాతీయ క్రికెట్ మండలి (ICC) ఇంకా తుది నిర్ణయం తీసుకోలేదు. ఈ నిర్ణయం తర్వాతే ఆస్ట్రేలియా అధికారికంగా WTC ఫైనల్కు అర్హత పొందుతుందనే ఆసక్తికర పరిస్థితి నెలకొంది. జూన్ 11న లార్డ్స్ మైదానంలో ప్రారంభమయ్యే డబ్ల్యూటీసీ ఫైనల్లో ఆస్ట్రేలియా జట్టు దక్షిణాఫ్రికా జట్టుతో తలపడనుంది.
పాట్ కమ్మిన్స్ నాయకత్వంలోని ఆస్ట్రేలియా, ఈ ఏడాది క్రికెట్ ప్రపంచంలో కీలక మ్యాచ్లలో ఒకటైన ఈ పోరులో భాగం అవుతోంది. ఇదిలా ఉంటే, ఈ నెలాఖరులో ఆస్ట్రేలియా శ్రీలంకలో రెండు మ్యాచ్ల టెస్ట్ సిరీస్ ఆడేందుకు సిద్ధమవుతోంది. భారత జట్టు ఈసారి డబ్ల్యూటీసీ ఫైనల్కు అర్హత సాధించలేకపోయింది. ఆస్ట్రేలియాతో జరిగిన ఐదు మ్యాచ్ల సిరీస్లో కనీసం డ్రా చేయడం లేదా విజయాన్ని నమోదు చేయడం అవసరమైనప్పటికీ, సిరీస్ను 3-1 తేడాతో కోల్పోయింది. ఈ ఫలితం ద్వారా భారత్ అధికారికంగా ఫైనల్ రేసు నుంచి తప్పుకోవాల్సి వచ్చింది. ఈ సిరీస్ అనంతరం భారత క్రికెట్ జట్టు కీలక ఆటగాళ్లు రోహిత్ శర్మ, విరాట్ కోహ్లీల భవిష్యత్తుపై పెద్ద చర్చ మొదలైంది.ఈ ఇద్దరూ తమ చివరి ఆస్ట్రేలియా సిరీస్ ఆడినట్టే అనిపిస్తోంది.
జట్టు పునర్నిర్మాణం అవసరమని, యువ ఆటగాళ్లకు అవకాశాలు కల్పించాలనే వాదనలు క్రికెట్ విశ్లేషకులు వ్యక్తం చేస్తున్నారు. భారత్-ఆస్ట్రేలియా సిరీస్ ఎన్నో ఉత్కంఠభరిత ఘట్టాలకు సాక్ష్యంగా నిలిచింది. కానీ, చివరికి ఆస్ట్రేలియా తన నిలకడైన ప్రదర్శనతో సిరీస్ను గెలుచుకుంది. ముఖ్యంగా ఆస్ట్రేలియన్ బౌలర్ల ధాటికి భారత బ్యాటింగ్ ఆర్డర్ నిలువలేకపోయింది. ఇది డబ్ల్యూటీసీ ఫైనల్ రేసులో భారత్కు బలమైన దెబ్బ తగిలేలా చేసింది.
