హైదరాబాద్: మంత్రి శ్రీధర్ బాబు టీఫైబర్ సేవలను ప్రారంభించారు. ఈ సేవలు తక్కువ ధరకే ఇంటర్నెట్, టీవీ, మొబైల్ సేవలను అందించనున్నాయి. హైదరాబాద్లో నిర్వహించిన ప్రజా విజయోత్సవాల సందర్భంగా ఈ కార్యక్రమాన్ని ప్రారంభించారు. ఈ కార్యక్రమంలో శ్రీధర్ బాబు మాట్లాడుతూ.. టీఫైబర్ ద్వారా అందించే సేవలు గ్రామీణ మరియు పట్టణ ప్రాంతాల్లో డిజిటల్ విప్లవానికి దోహదం చేస్తాయని చెప్పారు. ప్రజలకు తక్కువ ధరల్లో అధిక సేవలు అందించాలనే లక్ష్యంతో ఈ ప్రాజెక్ట్ రూపొందించామని వివరించారు. టీఫైబర్ ద్వారా ఇంటర్నెట్ మాత్రమే కాకుండా, టీవీ, మొబైల్ వంటి సేవలు ఒకే ప్లాట్ఫారమ్లో లభిస్తాయని అన్నారు. మీసేవ మొబైల్ యాప్ను కూడా ఈ సందర్భంగా శ్రీధర్ బాబు ప్రారంభించారు.
ఈ యాప్ ద్వారా ప్రజలు తక్కువ సమయంలోనే అవసరమైన సేవలను పొందవచ్చని తెలిపారు. టీఫైబర్ ద్వారా గ్రామీణ ప్రాంతాలకు డిజిటల్ కనెక్టివిటీ పెరుగుతుందని, విద్య, ఆరోగ్యం, వ్యవసాయం వంటి రంగాల్లో కొత్త అవకాశాలు సృష్టించబడతాయని ఆయన చెప్పారు. ప్రజలు ఈ సేవలను సద్వినియోగం చేసుకుని తమ జీవితాల్లో సౌకర్యాలు పెంచుకోవాలని ఆయన సూచించారు. ఈ సేవలు ప్రజల అవసరాలకు అనుగుణంగా మరింత మెరుగుపరచాలని ప్రభుత్వం కృషి చేస్తుందని తెలిపారు.
