Data Centers : డేటా సెంటర్లలో అమెరికా దూకుడు.. భారత్ స్థానం ఎంతంటే?

Data Centers : ప్రపంచ డిజిటల్ ఆర్థిక వ్యవస్థకు కీలకంగా మారిన డేటా సెంటర్ల రంగంలో అమెరికా తన ఆధిపత్యాన్ని కొనసాగిస్తోంది. ఆర్టిఫిషియల్ ఇంటెలిజెన్స్, క్లౌడ్ కంప్యూటింగ్, డేటా నిల్వ సేవలకు పెరుగుతున్న డిమాండ్ నేపథ్యంలో డేటా సెంటర్ల ప్రాధాన్యం మరింత పెరిగింది. తాజా గణాంకాల ప్రకారం ప్రపంచవ్యాప్తంగా 11,700కు పైగా డేటా సెంటర్లు ఉండగా, వాటిలో 5,427 సెంటర్లు అమెరికాలోనే ఉన్నాయి. ఇది మొత్తం ప్రపంచ డేటా సెంటర్లలో దాదాపు 46 శాతానికి సమానం.

టాప్ దేశాల జాబితాలో భారత్ స్థానం

డేటా సెంటర్ల సంఖ్య పరంగా జర్మనీ 529 సెంటర్లతో రెండో స్థానంలో నిలిచింది. యునైటెడ్ కింగ్‌డమ్ 523 సెంటర్లతో మూడో స్థానంలో ఉండగా, చైనా 449 సెంటర్లతో నాలుగో స్థానాన్ని దక్కించుకుంది. కెనడా 337 సెంటర్లతో ఐదో స్థానంలో ఉంది. ఈ జాబితాలో భారత్ 153 డేటా సెంటర్లతో 14వ స్థానంలో నిలిచింది. దేశంలో డిజిటల్ సేవల విస్తరణ, క్లౌడ్ ఆధారిత సేవల పెరుగుదలతో భవిష్యత్తులో ఈ సంఖ్య మరింత పెరిగే అవకాశాలు కనిపిస్తున్నాయి.

భవిష్యత్తులో భారీ వృద్ధి అంచనా

డేటా సెంటర్లు భారీ స్థాయిలో సమాచారాన్ని నిల్వ చేయడం, ప్రాసెస్ చేయడం, కమ్యూనికేషన్ సేవలను నిర్వహించడం వంటి కీలక బాధ్యతలను నిర్వర్తిస్తాయి. విశ్లేషకుల అంచనాల ప్రకారం 2026 నుంచి 2030 మధ్య ప్రపంచవ్యాప్తంగా దాదాపు 100 గిగావాట్ల కొత్త డేటా సెంటర్ సామర్థ్యం జతకానుంది. అయితే విద్యుత్ వినియోగం, నీటి అవసరాలు, మౌలిక సదుపాయాలపై ఒత్తిడి వంటి సవాళ్లు కూడా పెరుగుతున్నాయి. సాంకేతిక పెట్టుబడులు, బలమైన ఇంటర్నెట్ మౌలిక వసతులు, వ్యాపార అనుకూల విధానాలు అమెరికా ఆధిపత్యానికి ప్రధాన కారణాలుగా నిలుస్తున్నాయి.