Monalisa: మోనాలిసా మిస్సింగ్ !!

కుంభమేళాలో తన అందంతో సోషల్ మీడియాను ఊపేసిన మోనాలిసా ఉదంతం ఇప్పుడు పెను సంచలనంగా మారింది. మోనాలిసా ఆచూకీ గత కొన్ని రోజులుగా కనిపించడం లేదని ఆమె భర్తగా చెప్పుకుంటున్న ఫర్మాన్ ఖాన్ సోషల్ మీడియా వేదికగా ఒక సెల్ఫీ వీడియోను విడుదల చేశారు. రాజస్థాన్‌లోని అజ్మేర్ దర్గా దర్శనం కోసం వెళ్లిన సమయం నుండి ఆమె కనిపించడం లేదని, ఎక్కడ వెతికినా దొరకడం లేదని ఆయన ఆ వీడియోలో ఆవేదన వ్యక్తం చేశారు. అయితే, ఈ అదృశ్యం వెనుక అసలు నిజం ఏంటన్నది ఇప్పుడు పోలీసులకు సవాల్‌గా మారింది. ఆమె స్వచ్ఛందంగా వెళ్లిపోయిందా లేక దీని వెనుక మరేదైనా కుట్ర ఉందా అన్న కోణంలో దర్యాప్తు జరుగుతోంది.

మైనర్‌గా తేల్చిన NCST – ఫర్మాన్‌పై పోక్సో కేసు

ఈ కేసులో అత్యంత కీలకమైన అంశం మోనాలిసా వయసు. జాతీయ షెడ్యూల్డ్ తెగల కమిషన్ (NCST) జరిపిన విచారణలో మోనాలిసా మైనర్ అని, ఆమెకు ఇంకా పెళ్లి వయసు రాలేదని అధికారికంగా స్పష్టమైంది. మైనర్ అని తెలిసి కూడా ఆమెను వివాహం చేసుకోవడం చట్టరీత్యా నేరం కావడంతో, ఫర్మాన్ ఖాన్‌పై ఇప్పటికే పోక్సో (POCSO) చట్టం కింద కేసులు నమోదయ్యాయి. ఈ చట్టపరమైన చిక్కుల నుండి తప్పించుకోవడానికే ‘మిస్సింగ్’ డ్రామా ఆడుతున్నారా? అనే అనుమానాలను కూడా నెటిజన్లు వ్యక్తం చేస్తున్నారు.

కొనసాగుతున్న ఉత్కంఠ – పోలీసుల విచారణ

ఒకవైపు మైనర్ వివాహంపై చట్టపరమైన చర్యలు, మరోవైపు భర్త చెబుతున్న అదృశ్యం వార్తలు.. ఈ రెండింటి మధ్య మోనాలిసా క్షేమ సమాచారం ఇప్పుడు మిస్టరీగా మారింది. ఆమె మైనర్ అని తేలడంతో రాష్ట్ర గిరిజన సంక్షేమ శాఖ, పోలీసులు ఈ విషయాన్ని అత్యంత సీరియస్‌గా తీసుకున్నారు. ఆమె ఎక్కడున్నా వెంటనే గుర్తించి రక్షణ కల్పించాలని అధికారులు ఆదేశించారు. సోషల్ మీడియా ద్వారా పాపులర్ అయిన ఈ కుంభమేళా బ్యూటీ ఉదంతం చివరికి ఎటు దారితీస్తుందోనని నెటిజన్లు ఆసక్తిగా గమనిస్తున్నారు.