Andrea Jeremiah: మళ్ళీ ఆ నరకం నా వల్ల కాదు: ఆండ్రియా

Andrea Jeremiah: తెలుగు, తమిళ ప్రేక్షకులను విశేషంగా అలరించిన అడ్వెంచర్ థ్రిల్లర్ ‘యుగానికి ఒక్కడు’ (Aayirathil Oruvan) సీక్వెల్ గురించి ఆసక్తికర చర్చ జరుగుతున్న వేళ, నటి ఆండ్రియా జెర్మియా చేసిన వ్యాఖ్యలు కోలీవుడ్‌లో కలకలం రేపుతున్నాయి. సెల్వరాఘవన్ దర్శకత్వంలో తెరకెక్కిన ఈ చిత్రం అప్పట్లో ఒక సంచలనం. అయితే, దీని సీక్వెల్‌లో నటించే ప్రసక్తే లేదని ఆండ్రియా తెగేసి చెప్పడం ఇప్పుడు హాట్ టాపిక్ అయింది.

చోళుల చరిత్ర – ఒక సాహసయాత్ర

2010లో విడుదలైన ‘యుగానికి ఒక్కడు’ సినిమా కార్తీ, ఆండ్రియా, రీమా సేన్ కెరీర్‌లలో మైలురాయిగా నిలిచింది. ముఖ్యంగా తెలుగులో ఈ చిత్రానికి భారీ ఆదరణ లభించింది. అడవులు, ఎడారుల నేపథ్యంలో సాగే ఈ ఫాంటసీ అడ్వెంచర్ కోసం నటీనటులు సుమారు 200 రోజులకు పైగా అత్యంత క్లిష్ట పరిస్థితుల్లో పనిచేశారు.

Andrea Jeremiah: ఆండ్రియా ఆవేదన.. ఎందుకీ నిర్ణయం?

చాలా కాలంగా ఈ సినిమా సీక్వెల్ కోసం అభిమానులు ఎదురుచూస్తున్నారు. 2021లో సెల్వరాఘవన్, ధనుష్‌తో కలిసి ‘యుగానికి ఒక్కడు-2’ పోస్టర్‌ను కూడా రిలీజ్ చేశారు. అయితే ఈ సినిమాలో నటించడంపై ఆండ్రియాను సంప్రదించగా, ఆమె నిర్మొహమాటంగా ‘నో’ చెప్పడమే కాకుండా కొన్ని చేదు నిజాలను బయటపెట్టారు:

“ఆయన (సెల్వరాఘవన్) చెప్పే టైమింగ్‌కు, సెట్‌లో చేసే పనికి అస్సలు సంబంధం ఉండదు. షూటింగ్ సమయంలో నేను పడ్డ ఇబ్బందులు వర్ణనాతీతం.”సినిమా హిట్ అవ్వడం వల్ల అవకాశాలు వచ్చిన మాట వాస్తవమే అయినా, ఆ సమయంలో అనుభవించిన మానసిక, శారీరక ఒత్తిడిని తాను మర్చిపోలేనని ఆమె స్పష్టం చేశారు.”మళ్ళీ ఆయనతో సినిమా చేయడం నా వల్ల కాదు.. అది జరిగే పనే కాదు” అంటూ సెల్వరాఘవన్ దర్శకత్వంలో పని చేసేందుకు ఆండ్రియా సిద్ధంగా లేరని తేల్చి చెప్పారు.