JioHotstar VDO AI Partnership: క్రికెట్ స్కోర్, వెదర్‌ను బట్టి మారే యాడ్స్: జియోహాట్‌స్టార్ కీలక ఒప్పందం!

JioHotstar VDO AI Partnership: డిజిటల్ ప్రకటనల రంగంలో ఒక సరికొత్త విప్లవం రాబోతోంది. ఇకపై మీరు స్మార్ట్ టీవీ (CTV) లేదా ఓటీటీ (OTT) వేదికలపై చూసే ప్రకటనలు కేవలం స్క్రీన్‌కే పరిమితం కావు. మీ నగరంలో ఉష్ణోగ్రత ఎంత ఉంది? కాలుష్యం ఎలా ఉంది? లేదా మీరు చూస్తున్న క్రికెట్ మ్యాచ్ స్కోరు ఎంత? అనే విషయాలను గమనించి, దానికి అనుగుణంగా ప్రకటనలు తమ రూపాన్ని మార్చుకోనున్నాయి. ప్రముఖ స్ట్రీమింగ్ ప్లాట్‌ఫారమ్ జియోహాట్‌స్టార్ (JioHotstar) మరియు గ్లోబల్ అడ్-టెక్ సంస్థ VDO.AI భాగస్వామ్యంతో ఈ వినూత్న సాంకేతికత అందుబాటులోకి రానుంది. “క్రియేటివ్ ఇంటెలిజెన్స్ లేయర్” (Creative Intelligence Layer) అని పిలిచే ఈ వ్యవస్థ ద్వారా, వీక్షకుడి చుట్టూ ఉన్న నిజ-సమయ (Real-time) పరిస్థితులను బట్టి బ్రాండ్‌లు తమ ప్రకటనలను టార్గెట్ చేయవచ్చు.

అసలు ఈ టెక్నాలజీ ఎలా పనిచేస్తుంది?

VDO.AI అభివృద్ధి చేసిన ‘డైనమిక్ క్రియేటివ్ ఆప్టిమైజేషన్’ (Dynamic Creative Optimisation) ఇంజన్ ఈ ప్రక్రియలో కీలక పాత్ర పోషిస్తుంది.

లైవ్ ఫీడ్స్ గుర్తింపు: ఈ సిస్టమ్ వాతావరణం, గాలి నాణ్యత (AQI), క్రీడా స్కోర్లు, తాజా వార్తలు మరియు వీక్షకుడి లొకేషన్ డేటాను నిరంతరం ట్రాక్ చేస్తుంది.
ఆన్-ది-ఫ్లై మార్పులు: అందరికీ ఒకే రకమైన స్థిరమైన (Static) ప్రకటనను చూపించే పాత పద్ధతికి స్వస్తి పలుకుతూ.. వర్షం పడుతున్నప్పుడు ఒకలా, ఎండ తీవ్రత ఎక్కువగా ఉన్నప్పుడు మరోలా, లేదా మ్యాచ్ ఉత్కంఠభరితంగా సాగుతున్నప్పుడు దానికి తగినట్లుగా ప్రకటనలు క్షణాల్లో రీరైట్ అవుతాయి.

ప్రకటనలలో ‘టైమింగ్’ అత్యంత కీలకమని జియోస్టార్ డిజిటల్ ఎంటర్‌టైన్‌మెంట్ సేల్స్ హెడ్ భాస్కర్ రమేష్ పేర్కొన్నారు. సరైన సమయంలో వీక్షకుడి మూడ్‌ని క్యాచ్ చేస్తే ప్రకటనలు మరింత ప్రభావవంతంగా మారుతాయన్నారు. కంటెంట్, డిస్ట్రిబ్యూషన్ రంగాల్లో ఆవిష్కరణలు వచ్చినా అడ్వర్టైజింగ్ వెనుకబడిందని, ఈ సాంకేతికతతో ఆ లోటు తీరుతుందని VDO.AI కో-ఫౌండర్ అర్జిత్ సచ్‌దేవా అభిప్రాయపడ్డారు.

JioHotstar VDO AI Partnership: క్షేత్రస్థాయిలో సక్సెస్ అయిన ప్రయోగాలు

ఈ సరికొత్త విధానాన్ని ఇప్పటికే పలు దిగ్గజ బ్రాండ్‌లు విజయవంతంగా పరీక్షించాయి:

మారుతి సుజుకి & ఏజియో (AJIO): కౌంట్‌డౌన్ ఆధారిత లాంచ్‌ల కోసం దీనిని వాడాయి.
ఫ్లిప్‌కార్ట్: లైవ్ స్పోర్ట్స్ మూమెంట్స్‌కు అనుగుణంగా తమ మెసేజింగ్‌ను మార్చింది.
అర్బన్ కంపెనీ: వాతావరణ మార్పులకు ప్రతిస్పందించే (Weather-responsive) ప్రకటనలను ప్రదర్శించింది.
స్విగ్గీ ఇన్‌స్టామార్ట్: రియల్-టైమ్ సందర్భాన్ని బట్టి క్రియేటివ్స్‌పై క్యూఆర్ (QR) కోడ్‌లను జోడించింది.

ఫలితాలు: ఈ డైనమిక్ ప్రకటనల ద్వారా బ్రాండ్ అవేర్‌నెస్ 2.5 రెట్లు పెరగడమే కాకుండా, వినియోగదారులలో వస్తువులను కొనుగోలు చేయాలనే ఆసక్తి (Purchase Intent) ఏకంగా మూడు రెట్లు పెరిగినట్లు గణాంకాలు వెల్లడిస్తున్నాయి. దీనివల్ల జియోహాట్‌స్టార్‌కు ప్రకటనల ఆదాయం భారీగా పెరగనుండగా, స్మార్ట్ టీవీ వీక్షకులకు మాత్రం తాము ఏం చేస్తున్నామనే విషయాలను నిరంతరం గమనిస్తూ ప్రకటనలు వెంబడించనున్నాయి.