Hindustan Zinc : రికార్డు లాభాలు సాధించిన హిందుస్థాన్‌ జింక్‌

Hindustan Zinc : ప్రపంచంలోనే ప్రముఖ లోహ ఉత్పత్తి సంస్థ అయిన హిందుస్థాన్‌ జింక్‌ లిమిటెడ్‌ (HZL) 2026-27 ఆర్థిక సంవత్సరం రెండవ త్రైమాసికంలో ఊహించని స్థాయిలో అద్భుతమైన ఆర్థిక ఫలితాలను సాధించింది. గత సంవత్సరపు ఇదే సమయంతో పోలిస్తే కంపెనీ నికర లాభం ఏకంగా 142 శాతం పెరిగి రూ.6,412 కోట్లకు చేరింది. అదేవిధంగా మొత్తం ఆదాయం 77 శాతం వృద్ధితో రూ.15,093 కోట్లను తాకగా, ఎబిట్డా (EBITDA) 108 శాతం పెరుగుదలతో రూ.9,285 కోట్లుగా నమోదైంది. ప్రతికూల పరిస్థితుల్లోనూ ఉత్పత్తి వ్యయాన్ని తగ్గిస్తూ (జింక్ ఉత్పత్తి వ్యయం టన్నుకు 703 డాలర్లకు తగ్గడం) మరియు వెండి ఉత్పత్తిని 20 శాతం పెంచి 173 టన్నులకు చేర్చడం ఈ లాభాల శాతానికి ప్రధాన కారణమైంది. మెరుగైన ఆపరేషనల్ నిర్వహణ, నిలకడైన ఉత్పత్తి సామర్థ్యం కంపెనీకి ఈ స్థాయి రికార్డు ఫలితాలను అందించాయి.

వ్యూహాత్మక విస్తరణ మరియు హరిత భవిష్యత్తు

కేవలం సాంప్రదాయ లోహ ఉత్పత్తికే పరిమితం కాకుండా, భవిష్యత్తు అవసరాలకు అనుగుణంగా కంపెనీ తన వ్యాపారాన్ని విస్తరిస్తోంది. అందులో భాగంగా కర్ణాటకలోని గుండ్లుపేటలో అరుదైన భూ మూలకాల (Rare Earth Elements) బ్లాక్‌ కోసం ‘లెటర్ ఆఫ్ ఇంటెంట్’ పొందడం కీలక మైలురాయిగా నిలిచింది. అంతేకాకుండా, పర్యావరణ పరిరక్షణకు ప్రాధాన్యమిస్తూ తన మొత్తం విద్యుత్ వినియోగంలో పునరుత్పాదక ఇంధన వాటాను 27 శాతానికి పెంచడమే కాకుండా, జింక్ అల్లాయ్ ప్లాంట్‌ను పూర్తిగా గ్రీన్ ఎనర్జీతోనే నడుపుతోంది. కృత్రిమ మేధ (AI) సాంకేతికతను ఆపరేషన్లలో భాగం చేస్తూ, వ్యూహాత్మక విస్తరణల ద్వారా వాటాదారులకు సుదీర్ఘకాలం మెరుగైన విలువను అందించడమే తమ ముఖ్య లక్ష్యమని సీఈవో అమరేందు ప్రకాశ్ స్పష్టం చేశారు.