Varudu Kalyani: హోంమంత్రి అనిత వెంటనే రాజీనామా చేయాలి:

Varudu Kalyani: ఆంధ్రప్రదేశ్‌లో గత ప్రభుత్వం తీసుకొచ్చిన ‘దిశ’ చట్టం బిల్లును వెనక్కి తీసుకోవాలని కూటమి ప్రభుత్వం కేబినెట్‌లో నిర్ణయం తీసుకోవడంపై వైఎస్సార్‌సీపీ తీవ్ర స్థాయిలో మండిపడింది. ఈ నిర్ణయంపై వైఎస్సార్‌సీపీ ఎమ్మెల్సీ వరుదు కల్యాణి తీవ్రంగా స్పందిస్తూ ప్రభుత్వ తీరును తప్పుబట్టారు.

హోంమంత్రి తీరుపై వరుదు కల్యాణి విమర్శలు

రాష్ట్ర హోంమంత్రి అనిత ఒక ‘డమ్మీ’ హోంమంత్రిలా మారిపోయారని ఎమ్మెల్సీ వరుదు కల్యాణి తీవ్రస్థాయిలో ధ్వజమెత్తారు. మహిళా రక్షణకు సంబంధించిన కీలక చట్టాన్ని రద్దు చేస్తుంటే మౌనంగా ఉండటం సరికాదన్న ఆమె, అనిత తక్షణమే తన మంత్రి పదవికి రాజీనామా చేయాలని డిమాండ్ చేశారు. కేవలం మాజీ ముఖ్యమంత్రి వైఎస్ జగన్‌మోహన్‌రెడ్డిపై ఉన్న రాజకీయ కక్షసాధింపుతోనే కూటమి ప్రభుత్వం ‘దిశ’ చట్టాన్ని రద్దు చేసే నిర్ణయం తీసుకుందని ఆమె ఆరోపించారు.

Varudu Kalyani: సీఎం చంద్రబాబు క్షమాపణ చెప్పాలి

మహిళలకు రక్షణ కవచలా నిలిచే దిశ చట్టాన్ని రద్దు చేయడం ద్వారా ప్రభుత్వం మహిళా వ్యతిరేక విధానాలను అవలంబిస్తోందని కల్యాణి విమర్శించారు. కావాలంటే ఆ చట్టం పేరు మార్చుకోవడానికి తమకు ఎలాంటి అభ్యంతరం లేదని, కానీ మహిళల రక్షణను దృష్టిలో ఉంచుకుని చట్టాన్ని మాత్రం యథాతథంగా కొనసాగించాలని ఆమె డిమాండ్ చేశారు. దిశ చట్టాన్ని రద్దు చేసినందుకు ముఖ్యమంత్రి నారా చంద్రబాబు నాయుడు రాష్ట్రంలోని మహిళలందరికీ బేషరతుగా క్షమాపణలు చెప్పాలని వరుదు కల్యాణి డిమాండ్ చేశారు.