Guntur: యువతి ఆత్మహత్య..ప్రేమికుడితో తాళి కట్టించాలని

Guntur: ప్రేమ విఫలమైందనే తీవ్ర మనస్తాపంతో గుంటూరు జిల్లాకు చెందిన ఓ యువతి ముంబైలో బలవన్మరణానికి పాల్పడింది. పెళ్లి చేసుకుంటానని నమ్మించి, తీరా సమయానికి ప్రియుడు నిరాకరించడమే ఆమె మృతికి కారణమని బాధిత కుటుంబ సభ్యులు ఆరోపిస్తున్నారు. న్యాయం చేయాలంటూ యువతి మృతదేహంతో ప్రియుడి నివాసం వద్ద బంధువులు ఆందోళనకు దిగడంతో ప్రకాశం జిల్లాలో తీవ్ర ఉద్రిక్తత నెలకొంది.

ఎనిమిదేళ్ల ప్రేమ.. పెళ్లికి నిరాకరణ:

వివరాల్లోకి వెళితే.. గుంటూరు జిల్లా కొండ్రుపాడు గ్రామానికి చెందిన కీర్తి (26), ప్రకాశం జిల్లా పొందూరు మండలానికి చెందిన సాయి అనే యువకుడు గత ఎనిమిదేళ్లుగా ప్రేమించుకుంటున్నారు. మొదట్లో సోషల్ మీడియా వేదికగా పరిచయమైన వీరి బంధం, ఆ తర్వాత ప్రేమగా మారింది. అయితే, పెళ్లి ప్రస్తావన వచ్చేసరికి సాయి ముఖం చాటేసి, వివాహానికి నిరాకరించినట్లు తెలుస్తోంది. దీంతో తీవ్రమైన మానసిక వేదనకు గురైన కీర్తి, జులై 14న ముంబైలోని తన ఫ్లాట్‌లో ఉరివేసుకుని ఆత్మహత్యకు పాల్పడింది.

Guntur: మృతదేహానికి తాళి కట్టాలంటూ డిమాండ్:

ముంబైలో పోస్టుమార్టం అనంతరం కీర్తి భౌతికకాయాన్ని స్వగ్రామానికి తీసుకొచ్చిన కుటుంబ సభ్యులు, నేరుగా ప్రకాశం జిల్లాలోని సాయి ఇంటికి తరలించారు. తమ కుమార్తె ఆత్మహత్యకు కారణమైన సాయి, ఆమె చివరి కోరిక మేరకు మృతదేహానికి తాళి కట్టాలని డిమాండ్ చేస్తూ నిరసనకు దిగారు. బాధితుల ఆందోళనతో భయపడిన సాయి కుటుంబ సభ్యులు ఇంటికి తాళాలు వేసి పరారయ్యారు. ఆగ్రహానికి గురైన యువతి బంధువులు నిందితుడి ఇంటి గేట్లు పగలగొట్టి లోపలికి వెళ్లేందుకు ప్రయత్నించడంతో అక్కడ ఉత్కంఠ భరిత వాతావరణం ఏర్పడింది.

రంగంలోకి దిగిన పోలీసులు:

ఈ ఘటనపై సమాచారం అందుకున్న స్థానిక పోలీసులు తక్షణమే అక్కడికి చేరుకుని పరిస్థితిని అదుపులోకి తెచ్చారు. బాధిత కుటుంబ సభ్యులకు సర్దిచెప్పి, శాంతిభద్రతలకు విఘాతం కలగకుండా చర్యలు తీసుకున్నారు. ఈ ఆత్మహత్య ఘటనపై కేసు నమోదు చేసుకున్నామని, యువతి మృతికి గల కారణాలపై అన్ని కోణాల్లోనూ లోతుగా దర్యాప్తు జరుపుతున్నామని పోలీస్ అధికారులు వెల్లడించారు.