అక్రమ నిర్మాణాలపై జీహెచ్ఎంసీ గట్టి గట్టిగా: ఇక కఠిన చర్యలే!
హైదరాబాద్ నగరంలో రోజు రోజుకు పెరుగుతున్న అక్రమ నిర్మాణాలపై గ్రేటర్ హైదరాబాద్ మున్సిపల్ కార్పొరేషన్ (GHMC) అధికారులు ఇప్పుడు గట్టిగా వ్యవహరించేందుకు సిద్ధమయ్యారు. ఇటీవల హైకోర్టు తీవ్రంగా స్పందించిన నేపథ్యంలో అక్రమ నిర్మాణాలు, అలాగే అనుమతి తీసుకున్న ప్లాన్కు వ్యతిరేకంగా నిర్మాణాలు చేపట్టే వారిపై ఇకపై రూత్ లెస్ యాక్షన్ తీసుకోవాలని నిర్ణయించారు. జీహెచ్ఎంసీ కమిషనర్ ఆర్.వి. కర్ణన్ తాజాగా సర్క్యులర్ విడుదల చేసి కీలక ఆదేశాలు జారీ చేశారు. ఇకపై ప్లాన్ను ఉల్లంఘించి చేపట్టిన నిర్మాణాలు వెలుగు చూసిన వెంటనే వాటిని సీజ్ చేయాలని అధికారులకు సూచించారు.
ఈ మేరకు జీహెచ్ఎంసీ (GHMC) చట్టం 1955లోని సెక్షన్ 461-A ప్రకారం చర్యలు తీసుకునే హక్కు తమకు ఉందని తెలిపారు. టెలంగాణ రాష్ట్ర ప్రభుత్వం రూపొందించిన టీజీ-బీపాస్ (TG-Bpass) విధానాలను కూడా గుర్తు చేశారు. అక్రమ/తీసుకున్న అనుమతిని ఉల్లంఘిస్తూ చేపట్టిన నిర్మాణాలను అధికారులు గుర్తించిన వెంటనే సీజ్ చేయాల్సి ఉంటుందని పేర్కొన్నారు. అంతేకాక, ఇప్పటికే అక్రమంగా నిర్మించిన భవనాల్లో ఎవరైనా నివసిస్తున్నట్లయితే, వారికి మూడు రోజుల వ్యవధి ఇవ్వాలని, ఆ తర్వాత కఠిన చర్యలు తీసుకోవాలని స్పష్టం చేశారు.
సీజ్ ప్రక్రియకు ప్రత్యేక ప్రోటోకాల్: ఎర్రటి రిబ్బన్తో మూసివేత
సర్క్యులర్లో పేర్కొన్న విధంగా, అక్రమంగా నిర్మించిన భవనాల్లోని ప్రవేశ ద్వారాలు, మెట్లు, లిఫ్టులు, ర్యాంపులు అన్నింటినీ ఎర్రటి రంగు రిబ్బన్తో మూసివేయాలి. ప్రజలకు స్పష్టంగా నిబంధనలు తెలిసేలా చర్యలు తీసుకోవాలని అధికారులకు సూచించారు. ఈ నిర్ణయాన్ని ఇకపై మున్సిపల్ శాఖ కఠినంగా అమలు చేయనుంది. ఒక్కో నిర్మాణం వెనుక ఉన్న కారణాలు పరిశీలించకుండా, నిబంధనలు ఉల్లంఘించినట్టయితే యథావిధిగా చర్యలు తీసుకోవడం తప్పనిసరి అవుతుంది.
హైకోర్టు ఆగ్రహంతో ఒక్కసారిగా అలర్ట్ అయిన అధికారులు
హైదరాబాద్ నగరంలో అక్రమ నిర్మాణాల విషయంలో అధికారుల వైఖరిపై నిన్న హైకోర్టు తీవ్ర ఆగ్రహం వ్యక్తం చేసిన సంగతి తెలిసిందే. భవన నిర్మాణాలు పూర్తయ్యేంత వరకు అధికారులు ఏం చేస్తున్నారని, ఆ సమయంలో కళ్లు మూసుకుని వ్యవహరిస్తారా అంటూ ఘాటు వ్యాఖ్యలు చేసింది. ఓ భవన నిర్మాణదారుడు దాఖలు చేసిన పిటిషన్పై విచారణ సందర్భంగా ధర్మాసనం కీలక వ్యాఖ్యలు చేసింది.
ప్రాంతాల వారీగా పర్యవేక్షణకు అధికారులు ఉన్నప్పటికీ అక్రమ నిర్మాణాలు ఎలా సాధ్యమవుతున్నాయని హైకోర్టు ప్రశ్నించింది. అధికారుల నిర్లక్ష్య వైఖరి వల్లనే అక్రమ కట్టడాలు పుట్టగొడుగుల్లా పుట్టుకొస్తున్నాయని హైకోర్టు అభిప్రాయపడింది. అక్రమ నిర్మాణాలపై హైకోర్టు సీరియస్ వ్యాఖ్యలు చేసిన నేపథ్యంలో ఇకపై కఠినంగా వ్యవహరించాలని జీహెచ్ఎంసీ అధికారులు నిర్ణయానికి వచ్చారు.
మున్సిపల్ చట్టానికి విరుద్ధంగా ప్రవర్తిస్తే ఇక మినహాయింపు లేదు
హైదరాబాద్ నగరం వేగంగా అభివృద్ధి చెందుతున్నప్పటికీ, పలు ప్రాంతాల్లో అనుమతుల్లా నిర్మాణాలు పెరిగిపోతున్నాయి. ఇందులో కొంతమంది ప్రైవేటు నిర్మాణదారులు, కొంతమంది అధికారుల నిర్లక్ష్యం కారణంగా అక్రమ నిర్మాణాలు కొనసాగుతున్నాయి. దీనివల్ల నగర వ్యాపనం, ట్రాఫిక్, నీటి సరఫరా, పారిశుద్ధ్య సౌకర్యాలు అన్నీ ప్రభావితమవుతున్నాయి. ఈ నేపథ్యంలో అధికారుల కఠిన నిర్ణయం తప్పనిసరైంది. భవిష్యత్తులో ఇటువంటి అక్రమ నిర్మాణాలకు అవకాశం లేకుండా నియంత్రణ విధానాలను మరింత కఠినంగా మార్చే దిశగా అడుగులు పడుతున్నాయి.
Read also: TG Information: టీజీ సమాచార శాఖ స్పెషల్ కమిషనర్ గా సి.హెచ్.ప్రియాంక
