ప్రధానమంత్రి నరేంద్ర మోదీ(Narendra Modi) అధ్యక్షతన జరిగిన కేంద్ర కేబినెట్(Central Cabinet) సమావేశంలో కీలక నిర్ణయాలు తీసుకున్నారు. ఎమర్జెన్సీ(Emergency) విధించి 50 ఏళ్లు పూర్తయిన సందర్భంగా ప్రత్యేక తీర్మానాన్ని ఆమోదించారు. దేశంలో ఎమర్జెన్సీ విధించి ప్రజాస్వామ్యాన్ని ఖూనీ చేశారని తీర్మానాన్ని ఆమోదించారు. అంతకుముందు ఎమర్జెన్సీలో అణచివేతకు వ్యతిరేకంగా కేబినెట్(Cabinet) రెండు నిమిషాల పాటు మౌనం పాటించింది. కొత్త తరానికి ఎమర్జెన్సీ గురించి వివరించాలని కేంద్ర మంత్రులకు ప్రధాని మోదీ సూచించారు.
బుధవారం ప్రధానమంత్రి నరేంద్ర మోడీ అధ్యక్షతన జరిగిన మంత్రివర్గ సమావేశం జరిగింది. ఈ సమావేశంలో అత్యవసర పరిస్థితికి వ్యతిరేకంగా తీర్మానం ఆమోదించారు. దీంతో పాటు, మూడు ముఖ్యమైన ప్రతిపాదనలను మంత్రివర్గ సమావేశంలో ఆమోదించారు. పూణేలో మెట్రో విస్తరణ కోసం మెట్రో లైన్ 2 ను మంత్రివర్గం ఆమోదించింది. ఇందుకోసం రూ. 3,626 కోట్లు కేటాయించారు. దీంతో పాటు, జార్ఖండ్లోని ఝారియా బొగ్గు క్షేత్రాల అభివృద్దికి కోసం రూ. 5,940 కోట్లు ఆమోదించారు. ఆగ్రాలో అంతర్జాతీయ పొటాటో రీజినల్ రీసెర్చ్ సెంటర్ ఏర్పాటుకు కేంద్ర కేబినెట్ ఆమోదం తెలిపింది. ఇందుకోసం రూ. 111.5 కోట్లు కేటాయించారు.
అత్యవసర పరిస్థితికి వ్యతిరేకంగా మంత్రివర్గం ఆమోదం
అత్యవసర పరిస్థితిని, భారత రాజ్యాంగ స్ఫూర్తిని నాశనం చేయడానికి దాని ప్రయత్నాన్ని ధైర్యంగా వ్యతిరేకించిన లెక్కలేనన్ని వ్యక్తుల త్యాగాలను గుర్తుంచుకోవాలని, వారిని గౌరవించాలని ప్రధానమంత్రి నరేంద్ర మోడీ అధ్యక్షతన జరిగిన కేంద్ర మంత్రివర్గం నిర్ణయించింది. అత్యవసర పరిస్థితికి వ్యతిరేకంగా మంత్రివర్గం ఆమోదించిన తీర్మానం పేర్కొంది.
రాజ్యాంగ హత్య దివస్ 50వ వార్షికోత్సవం
ఈ సందర్భంగా, రాజ్యాంగబద్ధంగా హామీ ఇచ్చిన ప్రజాస్వామ్య హక్కులను హరించిన వారికి, ఆపై ఊహించలేని భయానక పరిస్థితులను ఎదుర్కోవాల్సిన వారికి నివాళిగా కేంద్ర మంత్రివర్గం రెండు నిమిషాలు మౌనం పాటించింది. ఎమర్జెన్సీ పరిస్థితిఅతిక్రమణలకు వ్యతిరేకంగా వారి ఆదర్శప్రాయమైన ధైర్యం, వీరోచిత ప్రతిఘటనకు కేంద్ర మంత్రివర్గం నివాళులర్పించింది. 2025 సంవత్సరం రాజ్యాంగ హత్య దివస్ 50వ వార్షికోత్సవాన్ని సూచిస్తుందని, ఇది భారతదేశ చరిత్రలో ఒక మరపురాని అధ్యాయం అని కేంద్ర కేబినెట్ అభిప్రాయపడింది.
భారతదేశం రాజ్యాంగ విలువల పరిరక్షణ
భారత రాజ్యాంగం బలం, దేశ ప్రజాస్వామ్య విలువలపై భారత ప్రజలకు అచంచల విశ్వాసం ఉందని కేంద్ర మంత్రివర్గం పునరుద్ఘాటించింది. నియంతృత్వ ధోరణులను వ్యతిరేకించి, మన రాజ్యాంగాన్ని, ప్రజాస్వామ్య చట్రాన్ని రక్షించడానికి దృఢంగా నిలబడిన వారి నుండి ప్రేరణ పొందడం వృద్ధులకు ఎంత ముఖ్యమో, యువతకు అంతే ముఖ్యమని ప్రధాని మోదీ అన్నారు. ప్రజాస్వామ్యానికి తల్లిగా, భారతదేశం రాజ్యాంగ విలువల పరిరక్షణ, దేశ భద్రత, పౌరుల రక్షణకు ఒక ఉదాహరణ అని తీర్మానం పేర్కొంది.
పుణె మెట్రో రైలు ప్రాజెక్టు రెండవ దశను కేంద్ర మంత్రివర్గం ఆమోదం
కేంద్ర కేబినెట్ నిర్ణయాలను కేంద్ర మంత్రి అశ్విని వైష్ణవ్ మీడియాకు వివరిచారు. పుణె మెట్రో రైలు ప్రాజెక్టు రెండవ దశను కేంద్ర మంత్రివర్గం ఆమోదించిందని చెప్పారు. వనాజ్ నుండి చాందిని చౌక్ (కారిడార్ 2A), రాంవాడి నుండి వాఘోలి/విఠల్వాడి (కారిడార్ 2B), ఇది దశ I కింద ఉన్న వనాజ్-రాంవాడి కారిడార్ పొడిగింపు. ఈ రెండు ఎలివేటెడ్ కారిడార్లు 12.75 కి.మీ. విస్తరించి ఉంటాయి. 13 స్టేషన్లను కలిగి ఉంటాయి.
జార్ఖండ్లోని ఝరియా కోల్ఫీల్డ్ అభివృద్ధికి కేంద్ర కేబినెట్ ఆమోదం
జార్ఖండ్లోని ఝరియా కోల్ఫీల్డ్ అభివృద్ధికి కేంద్ర కేబినెట్ ఆమోదం తెలిపింది. కోల్ఫీల్డ్లో జరిగే అగ్నిప్రమాదాలు, భూమి క్షీణత, బాధిత కుటుంబాల పునరావాసానికి సంబంధించిన సమస్యలను పరిష్కరించడానికి సవరించిన ఝరియా మాస్టర్ ప్లాన్ (JMP) ను కేంద్ర కేబినెట్ కమిటీ ఆమోదించిందని మంత్రి అశ్విని వైష్ణవ్ తెలిపారు. ఉత్తరప్రదేశ్లోని ఆగ్రాలో అంతర్జాతీయ బంగాళాదుంప కేంద్రం(CIP) ఏర్పాటుకు కేంద్రం ఆమోదం తెలిపింది. దక్షిణాసియా ప్రాంతీయ కేంద్రం (CSARC)ను స్థాపించాలనే వ్యవసాయం, రైతు సంక్షేమ శాఖ ప్రతిపాదనను కేంద్ర మంత్రివర్గం ఆమోదించిందని మంత్రి అశ్విని వైష్ణవ్ తెలిపారు.
Read Also: Kishan Reddy: కేంద్ర రైల్వే శాఖ మంత్రితో కిషన్రెడ్డి సమావేశం
