Iran Israel War: ట్రంప్ హెచ్చరికతో చమురు ధరలకు రెక్కలు!

ఇరాన్-ఇజ్రాయెల్ యుద్దం(Iran Israel War) రోజురోజుకూ ముదురుతోంది. యుద్దం మొదలై ఐదు రోజులు గడుస్తున్న నేపథ్యంలో ఇరు దేశాల మధ్య దాడులు, ప్రతిదాడులతో పశ్చిమాసియా దద్దరిల్లుతోంది. ఈ నేపథ్యంలో ఇజ్రాయెల్(Israel) కు తగులుతున్న దెబ్బలతో అమెరికాతో పాటు ఇతర మిత్రదేశాలూ పరోక్ష సాయం ప్రారంభించాయి. అదే సమయంలో ఇరాన్ కు మరింత ఎక్కువ అవకాశం ఇవ్వకూడదని భావిస్తున్న ఇజ్రాయెల్ .. టెహ్రాన్(Tehran) పై భారీ దాడులకు ప్లాన్ చేసింది. దీన్ని అమెరికా అధ్యక్షుడు ట్రంప్(Trump) సైతం ధృవీకరించారు.

ట్రంప్ హెచ్చరిక – టెహ్రాన్‌ను ఖాళీ చేయండి!
ఇరాన్ తమపై సంధిస్తున్న వరుస క్షిపణులతో ఉక్కిరిబిక్కిరవుతున్న ఇజ్రాయెల్ అంతిమ యుద్దానికి సిద్దమవున్నట్లు తెలుస్తోంది. ఇప్పటికే ఇరాన్ రాజధాని టెహ్రాన్ పై వరుస దాడులు చేస్తూన్న ఇజ్రాయెల్ ఈ నగరంపై పట్టు సాధించినట్లు ప్రకటన కూడా చేసింది. ఈ నేపథ్యంలో పూర్తి స్ధాయిలో టెహ్రాన్ పై విరుచుకుపడేందుకు సిద్దమవుతోంది. ఇందుకోసం టెహ్రాన్ లో పౌరుల్ని నగరం విడిచి వెళ్లాలంటూ సూచనలు కూడా చేస్తోంది. అయితే ఇదే సూచన ఇప్పుడు అమెరికా అధ్యక్షుడు ట్రంప్ కూడా చేయడంతో టెహ్రాన్ లో భారీ ఉత్పాతం తప్పేలా లేదు.

చమురు ధరలపై యుద్ధం ప్రభావం
ట్రంప్ ప్రకటన ప్రభావం అంతర్జాతీయ మార్కెట్లపై పడింది. అంతర్జాతీయ స్టాక్ మార్కెట్లు నష్టాలతో కొనసాగుతుండగా.. చమురు మార్కెట్లు సైతం పతనమవుతున్నాయి. దీంతో చమురు ధరల మంట ప్రారంభమైంది. ఇవాళ ఒక్క రోజే అంతర్జాతీయ మార్కెట్లో క్రూడాయిల్ బ్రెంట్ ధర 2 శాతం పెరిగింది. ఈ ధర మరింత పెరిగే అవకాశాలు కనిపిస్తోంది. ఇప్పటికే ప్రపంచ దేశాలకు అవసరమయ్యే చమురులో 6 శాతం సరఫరాకు వాడుతున్న హార్ముజ్ జలసంధిని మూసేస్తామని ఇరాన్ చేస్తున్న హెచ్చరికల ప్రభావం కూడా చమురు ధరల మంటకు కారణమవుతోంది.
ప్రస్తుతానికి భారత్ వంటి దేశాల్లో చమురు నిల్వలు రెండు నెలకు పైగా ఉన్నాయి. కాబట్టి వెంటనే కలిగే నష్టమేదీ లేకపోయినా ఈ యుద్దం దీర్ఘకాలికంగా సాగితే మాత్రం ప్రపంచ వ్యాప్తంగా తీవ్ర సమస్యలు తప్పేలా లేవు. అందుకే ఇరాన్-ఇజ్రాయెల్ ఇద్దరూ వెనక్కి తగ్గాలని ఐక్యరాజ్యసమితితో పాటు జీ7 దేశాల కూటమి కూడా కోరింది. ఇందుకోసం తెర వెనుక భారీ ఎత్తున మధ్యవర్తిత్వం కొనసాగుతున్నట్లు తెలుస్తోంది. హార్ముజ్ జలసంధి ద్వారానే ప్రపంచ చమురు సరఫరాలో 6% జరుగుతోంది. ఇది మూసితే, ధరలు $100+ బ్యారెల్‌కి వెళ్తాయని నిపుణుల అంచనా.