అమెరికా అధ్యక్ష పీఠాన్ని రెండోసారి అధిష్ఠించిన డొనాల్డ్ ట్రంప్ మరోమారు అధ్యక్షుడు కావాలనుకుంటున్నారా? ఈ ప్రశ్నకు అవుననే సమాధానం వినిపిస్తోంది. నిజానికి అమెరికా రాజ్యాంగం ప్రకారం ఏ వ్యక్తీ రెండుసార్లకు మించి అధ్యక్ష పదవిని అధిష్ఠించడానికి వీల్లేదు. అయితే, ట్రంప్ మాత్రం మూడోసారి, వీలైతే నాలుగోసారి కూడా వైట్హౌస్ను ఏలాలని కలలుకంటున్నారు. మూడోసారి అధ్యక్ష పీఠాన్ని అధిష్ఠించడంపై ఆయన పదేపదే చేస్తున్న వ్యాఖ్యలు ఇందుకు బలం చేకూరుస్తున్నాయి.
తనను మూడోసారి చూడాలని కోరుతున్నారు: ట్రంప్
రాజ్యాంగం అనుమతించకపోయినా.. మూడోసారి అధ్యక్షుడు కావడానికి చాలా మార్గాలు ఉన్నాయని ట్రంప్ ఇటీవల పేర్కొన్నారు. తాను ‘జోక్’ చేయడం లేదని కూడా చెప్పారు. తనను మూడోసారి కూడా అధ్యక్షుడిగా చూడాలని చాలామంది కోరుకుంటున్నారని ఎన్బీసీ న్యూస్కు ఇచ్చిన ఇంటర్వ్యూలో ట్రంప్ చెప్పారు. మరోమారు అధ్యక్షుడు కావాలనుకుంటున్నారా? అందుకు ఏమైనా వ్యూహాలున్నాయా? అన్న ప్రశ్నకు ట్రంప్ బదులిస్తూ.. అందుకు మార్గాలున్నాయని చెప్పారు.
మూడునాలుగుసార్లు సేవ చేయడం జీవితంలో గొప్ప గౌరవం: ట్రంప్
ఈ ఏడాది జనవరిలో నెవడాలో నిర్వహించిన ర్యాలీలో ట్రంప్ మాట్లాడుతూ అమెరికాకు ఒకటి రెండుసార్లు కాదు, మూడునాలుగుసార్లు సేవ చేయడం జీవితంలో గొప్ప గౌరవం అవుతుందని పేర్కొన్నారు. వచ్చే నాలుగు సంవత్సరాలు తాను విశ్రాంతి తీసుకోబోనని స్పష్టం చేశారు. వైట్హౌస్లో ఇటీవల నిర్వహించిన బ్లాక్ హిస్టరీ మంత్ కార్యక్రమంలో ట్రంప్ తన మద్దతుదారులను ఉద్దేశించి మాట్లాడుతూ.. ‘మరోసారి పోటీ చేయాలా?’ అని అడిగారు. దానికి వారు ‘మరో నాలుగేళ్లు’ అని నినాదాలు చేశారు.
ట్రంప్ మూడోసారి బరిలోకి దిగుతారనే సంకేతాలు
మూడోసారి అధ్యక్ష పదవికి పోటీ చేయడంపై ట్రంప్ గతంలోనూ వ్యాఖ్యలు చేసినప్పటికీ రిపబ్లికన్లు వాటిని జోక్గా, విమర్శకులను రెచ్చగొట్టే ప్రయత్నంగా కొట్టిపడేశారు. అయితే, టెనెస్సీ రిపబ్లికన్ ప్రతినిధి ఆండీ ఒగ్లెస్ ప్రస్తుతం ఉన్న రెండు సార్లు పదవీకాల పరిమితిని తొలగించే తీర్మానాన్ని ప్రతిపాదించడం ద్వారా ట్రంప్ మూడోసారి బరిలోకి దిగుతారనే సంకేతాలు ఇచ్చారు.
