ఆంధ్రప్రదేశ్ ఉప ముఖ్యమంత్రి పవన్ కళ్యాణ్ భక్తులకు తీపి కబురు అందించారు. రాష్ట్రంలోని ప్రముఖ పుణ్యక్షేత్రాల్లో భక్తుల సౌకర్యార్థం మూడు కీలక గిరి ప్రదక్షిణ మార్గాలను ఏర్పాటు చేస్తున్నట్లు ప్రకటించారు. ఇందులో భాగంగా విజయనగరం జిల్లాలోని చారిత్రాత్మక రామతీర్థం గిరి ప్రదక్షిణ మార్గాన్ని బుధవారం (మార్చి 25) ఆయన వర్చువల్ విధానంలో ప్రారంభించారు. సీతారాముని పేట కూడలి నుండి నీలాచలం కొండ వరకు సుమారు 3.70 కిలోమీటర్ల మేర ఈ రహదారిని రూ.3.40 కోట్ల ఉపాధి హామీ నిధులతో నిర్మించారు. గతంలో రాళ్లు, రప్పలు, ముళ్ళ పొదలతో నిండి భక్తులకు ఇబ్బందిగా ఉన్న ఈ మార్గాన్ని ఇప్పుడు సుందరమైన బీటీ రోడ్డుగా తీర్చిదిద్దారు.
Read Also : Donald Trump: ట్రంప్ శాంతి ప్రణాళిక 15 పాయింట్లు
శ్రీకాళహస్తి నుంచి కోటప్పకొండ వరకు విస్తరణ
ఆలయాల అభివృద్ధి మరియు హిందూ ధర్మ పరిరక్షణకు కూటమి ప్రభుత్వం కట్టుబడి ఉందని ఈ సందర్భంగా పవన్ కళ్యాణ్ స్పష్టం చేశారు. ఇప్పటికే చిత్తూరు జిల్లాలోని శ్రీకాళహస్తిలో గిరి ప్రదక్షిణ మార్గాన్ని అందుబాటులోకి తెచ్చామని, తాజాగా రామతీర్థం మార్గాన్ని పూర్తి చేశామని వివరించారు. ఇదే క్రమంలో పల్నాడు జిల్లాలోని ప్రసిద్ధ కోటప్పకొండ క్షేత్రంలో కూడా గిరి ప్రదక్షిణ మార్గం కోసం నిధులు మంజూరు చేశామని, త్వరలోనే అక్కడ కూడా పనులు పూర్తి చేసి భక్తులకు అంకితం చేస్తామని వెల్లడించారు. గత 20 నెలల కాలంలో రాష్ట్రవ్యాప్తంగా 22 ప్రధాన ఆలయాలకు సుమారు రూ.40 కోట్లకు పైగా నిధులతో రోడ్డు సౌకర్యాలు కల్పించడం విశేషం.
భక్తి భావం – ముక్తి మార్గం
రామతీర్థం క్షేత్రానికి రామాయణ, మహాభారత కాలం నాటి విశిష్టత ఉందని, ఇక్కడ కొండ చుట్టూ గిరి ప్రదక్షిణ చేస్తే ముక్తి లభిస్తుందని భక్తుల ప్రగాఢ విశ్వాసం. ముఖ్యంగా వైకుంఠ ఏకాదశి, మహా శివరాత్రి వంటి పర్వదినాల్లో వేల సంఖ్యలో భక్తులు ఇక్కడ ప్రదక్షిణలు చేస్తారు. శ్రీరామ నవమికి సరిగ్గా రెండు రోజుల ముందే ఈ నూతన మార్గాన్ని భక్తులకు అందుబాటులోకి తీసుకురావడంపై హర్షం వ్యక్తమవుతోంది. దేవాలయాల పవిత్రతను కాపాడటంతో పాటు, దేశ సంస్కృతి, సంప్రదాయాలను పరిరక్షించడమే లక్ష్యంగా ఈ ప్రాజెక్టులను చేపట్టినట్లు పవన్ కళ్యాణ్ పేర్కొన్నారు. స్వామివారి సేవలో ఈ అదృష్టం కలగడం పట్ల ఆయన సంతోషం వ్యక్తం చేశారు.
Read Also hindi news: hindi.vaartha.com
Read Also Epaper : epaper.vaartha.com
Read Also :
